കഴിഞ്ഞ വര്‍ഷം അവസാനത്തോടെ ലോകത്തെ ഞെട്ടിച്ചു കൊണ്ടെത്തിയ കൊറോണ വൈറസ് കേസുകളുടെ എണ്ണം 19 ദശലക്ഷത്തിലെത്തി നില്‍ക്കുകയാണ്. ലോകമെമ്പാടുമുള്ള ശാസ്ത്രജ്ഞരും ഗവേഷകരും വാക്സിനായി രാവും പകലും പ്രവര്‍ത്തിക്കുകയാണ്. വൈറസിനെ തുരത്താനുള്ള മരുന്ന് കണ്ടുപിടിക്കാനുള്ള ശ്രമത്തിലാണ് ഇവര്‍.
നേരത്തെ പനി, വരണ്ട ചുമ, തൊണ്ടവേദന, ശ്വാസതടസ്സം എന്നിവ കൊറോണയുടെ പ്രധാനലക്ഷങ്ങളായി കണക്കാക്കിയിരുന്നു. എന്നാല്‍ കഴിഞ്ഞ കുറച്ചു ദിവസങ്ങളായി മറ്റ് ലക്ഷണങ്ങളും തുടക്കമായി കണ്ടെത്തിയിട്ടുണ്ട്. ശ്വാസകോശ സംബന്ധമായ അസുഖങ്ങള്‍, രുചിയും മണവും നഷ്ടപ്പെടുന്നത്, കണ്ണിന്റെ പ്രശ്‌നങ്ങള്‍, ചര്‍മ്മത്തിലെ തിണര്‍പ്പ്, തലകറക്കം എന്നിവയും കൊറൊണയുടെ തുടക്കമായി മാറുന്നുണ്ട് ചില രോഗികളില്‍.
ലോകത്ത് ഇപ്പോള്‍ 19 ദശലക്ഷത്തിലധികമാണ് കൊറൊണ കേസുകള്‍. മുമ്പൊരിക്കലും കണ്ടിട്ടില്ലാത്ത രീതിയില്‍ തല മുതല്‍ കാല്‍ വരെ ശരീരത്തെ മുഴുവന്‍ സ്വാധീനിക്കുന്നതാണ് കൊറോണ വൈറസിന്റെ പ്രത്യകത. അമേരിക്കന്‍ ജേണല്‍ ഓഫ് എമര്‍ജന്‍സി മെഡിസിനില്‍ പ്രസിദ്ധീകരിച്ച ഒരു പഠനം കൊറൊണയുടെ പുതിയ ലക്ഷണങ്ങളെ കുറിച്ചാണ് പറയുന്നത്. 62കാരനായ ഒരു രോഗിയെ കുറിച്ച് ഇതില്‍ പറയുന്നുണ്ട്. തുടര്‍ച്ചയായ എക്കിളുകള്‍ കാരണമാണ് ഇയാളെ ആശുപത്രിയില്‍ പ്രവേശിപ്പിക്കുന്നത്. രോഗിക്ക് ശ്വാസകോശ സംബന്ധമായ അസുഖങ്ങളുടെ ചരിത്രമൊന്നുമില്ലായിരുന്നു. ഒപ്പം ഇയാള്‍ക്ക് കൊറൊണയുടെ ലക്ഷണങ്ങള്‍ ഒന്നും തന്നെയില്ല. നാലു ദിവസമായി തുടര്‍ച്ചയായി എക്കിളുണ്ടായിരുന്നുവെന്ന് മാത്രം. ആശുപത്രിയില്‍ പ്രവേശിപ്പിച്ച ദിവസം ഇയാള്‍ക്ക് 99.1 ഡിഗ്രി ചൂടായിരുന്നു ശരീരത്തിന്.
എന്നാല്‍ ഇയാളുടെ നിരന്തരമായ എക്കിളിന്റെ കാരണം കണ്ടെത്തുന്നതിനായി ഡോക്ടര്‍മാര്‍ എക്‌സറേ എടുത്തു. എക്‌സറേ പരിശോധിച്ചപ്പോള്‍ മാത്രമാണ് ശ്വാസകോശത്തിലെ അസാധാരണമായ മാറ്റങ്ങള്‍ കണ്ടെത്താന്‍ ഡോക്ടര്‍മാര്‍ക്ക് സാധിച്ചത്. ശ്വാസകോശം മങ്ങിയ രീതിയിലും രക്തസ്രാവം ഉണ്ടാവുകയും ശ്വാസകോശത്തിന് വീക്കവും കണ്ടെത്താന്‍ സാധിച്ചു. എക്‌സ്-റേയുടെ കണ്ടെത്തലുകള്‍ അനുസരിച്ച്, ഡോക്ടര്‍മാര്‍ സിടി സ്‌കാന്‍ നടത്തി, ഇതിലൂടെ ശ്വാസകോശത്തിന്റെ വീക്കം സ്ഥിരീകരിച്ചു. ഇതോടെ രോഗിയെ കൊറൊണ പരിശോധനയ്‌ക്ക് വിധേയനാക്കി. അപ്പോഴേക്കും ശരീരത്തിന്റെ ചൂട് 101.1 ഡിഗ്രിയാവുകയും ഹൃദയമിടിപ്പ് വര്‍ധിക്കുകയും ചെയ്തു. ഒപ്പം ഇദ്ദേഹത്തിന് കൊറൊണ സ്ഥിരീകരിക്കുകയും ചെയ്തു. അതോടെ നിരന്തരമായി എക്കിളുകളുള്ള രോഗികളേയും കൊറൊണ ടെസ്റ്റിന് വിധേയമാക്കണമെന്ന് ഡോക്ടര്‍മാര്‍ വിലയിരുത്തി.
