ആന്ഡ്രോയ്ഡ് ഫോണുകളില് ഉപയോഗിക്കുന്ന ക്വാല്കോം പ്രൊസസര് ചിപ്പുകളില് സുരക്ഷാ വീഴ്ച്ച. ഗൂഗിള്, സാംസങ്, എല്ജി എന്നിവ ഉള്പ്പെടെ ആഗോള തലത്തിലുള്ള 40 ശതമാനം സ്മാര്ട്ട് ഫോണുകളും ഉപയോഗിക്കുന്നത് ക്വാല്കോമിന്റെ പ്രൊസസര് ചിപ്പുകളാണ്. സൈബര് സുരക്ഷാ സ്ഥപനമായ ചെക്ക് പോയിന്റാണ് സുരക്ഷാ വീഴ്ച്ച കണ്ടെത്തിയത്. 400 ല് അധികം സുരക്ഷാ പ്രശ്നങ്ങളാണ് ക്വാല്കോം ചിപ്പില് കണ്ടെത്തിയിരിക്കുന്നത്. ആഗോള തലത്തില് 300 കോടി ആന്ഡ്രോയ്ഡ് ഉപഭോക്താക്കളെ സൈബര് സുരക്ഷാ ഭീഷണിയിലാക്കുന്ന പ്രശ്നങ്ങളാണിതെന്നാണ് സൂചനകള്.
ക്വാല്കോമിന്റെ ഡിജിറ്റല് സിഗ്നല് പ്രൊസസര്/ ഡിഎസ്പി ചിപ്പിലാണ് സുരക്ഷാ വീഴ്ച്ച കണ്ടെത്തിയത്. അതിവേഗ ചാര്ജിംഗ്, വീഡിയോ, എച്ച് ഡി വീഡിയോ റെക്കോര്ഡിംഗ്, ശബ്ദസംവിധാനങ്ങള് എന്നിങ്ങനെ സ്മാര്ട്ട് ഫോണിന്റെ പല സുപ്രധാന പ്രവര്ത്തനങ്ങളും ഏകോപിപ്പിക്കുന്നതും പ്രവര്ത്തനക്ഷമമാക്കുന്നതും ഡിഎസ്പിയാണ്. ഡിഎസ്പി ചിപ്പിലെ സുരക്ഷാ വീഴ്ച്ച ദുരുപയോഗം ചെയ്ത ഹാക്കര്മാര്ക്ക് സ്മാര്ട്ട് ഫോണിനെ രഹസ്യ നിരീക്ഷണ കേന്ദ്രമാക്കി മാറ്റാന് സാധിക്കുമെന്നാണ് ചെക്ക് പോയിന്റ് ഗവേഷകര് കണ്ടെത്തിയത്.
ഫോണിലെ ചിത്രങ്ങള്, വീഡിയോകള്, കോള് റെക്കോര്ഡുകള്, തത്സമയ മൈക്രോഫോണ് വിവരങ്ങള്, ജിപിഎസ്, ലൊക്കേഷന് എന്നിവയെല്ലാം ഹാക്കര്മാര്ക്ക് ലഭിക്കും. ഇവയുടെയെല്ലാം നിയന്ത്രണം ഹാക്കര്മാരുടെ കയ്യിലാകുമെന്നും ഗവേഷകര് മുന്നറിയിപ്പ് നല്കുന്നു.
നിലവില് ഹാക്കര്മാര് ഈ പ്രശ്നം ദുരുപയോഗം ചെയ്യുന്നതായി കണ്ടെത്താന് കഴിഞ്ഞിട്ടില്ല. എന്നാല് എത്രയും വേഗം ഫോണുകല് അപ്ഡേറ്റ് ചെയ്യണമെന്നും ഗൂഗിള് പ്ലേ സ്റ്റോറില് നിന്നും മാത്രമെ ആപ്പുകള് ഇന്സ്റ്റാള് ചെയ്യാവൂവെന്നും ക്വാല്കോം കമ്പനി അറിയിച്ചിട്ടുണ്ട്.
Comments