ന്യൂഡല്‍ഹി:കൊറോണ വാക്‌സിനുമായി ബന്ധപ്പെട്ട ദേശീയതല വിദഗ്ധ സമിതിയോഗം ഇന്ന് നടക്കും. കേന്ദ്ര ആരോഗ്യമന്ത്രി ഡോ. ഹര്‍ഷവര്‍ദ്ധന്റെ അധ്യക്ഷതയിലാണ് യോഗം നടക്കുക. കൊറോണ വാക്‌സിന്‍ തയ്യാറാകുന്ന മുറയ്‌ക്ക് രാജ്യത്ത് എങ്ങനെയാണ് അതിന്റെ വിതരണം നടക്കേണ്ടത്. ഏതൊക്കെ സ്ഥാപനങ്ങള്‍ക്കാണ് ഇതിന്റെ ചുമതല നല്‍കേണ്ടത് എന്നീ കാര്യങ്ങള്‍ തീരുമാനിക്കും. പൊതു സ്വകാര്യ മേഖലയില്‍ വാക്‌സിന്‍ ലഭ്യമാക്കുന്നതിനും മറ്റ് വ്യാജനിര്‍മ്മാണങ്ങള്‍ തടയുന്നതിനും എടുക്കേണ്ട നടപടികളും ചര്‍ച്ച ചെയ്യുമെന്നും നിതി അയോഗ് ആരോഗ്യവിഭാഗം മേധാവി ഡോ.വി.കെ.പോള്‍ അറിയിച്ചു.
വാക്‌സിന്‍ നല്‍കാന്‍ തീരുമാനിക്കുന്ന കാലഘട്ടം മുതല്‍ ദേശവ്യാപകമായി അത് എത്തിക്കേണ്ടതിന്റെ സാധ്യതയാണ് യോഗത്തില്‍ ചര്‍ച്ച ചെയ്യുക. ശീതീകരണ സംവിധാനം ഘടിപ്പിച്ച വാഹനങ്ങള്‍, വാക്‌സിന്‍ സൂക്ഷിക്കേണ്ട കേന്ദ്രങ്ങളുടെ സുരക്ഷ, ആരോഗ്യപ്രവര്‍ത്തകര്‍ സ്വീകരിക്കേണ്ട മാനദണ്ഡങ്ങള്‍ എന്നിവ തീരുമാനിക്കുമെന്നും ഡോ. പോള്‍ അറിയിച്ചു. നിലവില്‍ മൂന്ന് ഇന്ത്യന്‍ കമ്പനികളാണ് വാക്‌സിന്‍ വികസിപ്പിച്ച് പരീക്ഷണങ്ങള്‍ നടത്തുന്നത്. ആഗോള തലത്തില്‍ അമേരിക്ക. യുകെ, റഷ്യ, ചൈന എന്നീ രാജ്യങ്ങളിലായി 24 വാക്‌സിനുകളാണ് പരീക്ഷണങ്ങളുടെ വിവിധ ഘട്ടങ്ങളിലുള്ളത്.
