ന്യൂഡല്‍ഹി: ഇന്ത്യന്‍ ക്രിക്കറ്റിന് രണ്ടു ലോകകിരീടങ്ങള്‍ സമ്മാനിച്ച മഹേന്ദ്രസിംഗ് ധോണിയുടെ വിടവാങ്ങള്‍ തണുപ്പിക്കുകയാണെന്ന് ആരാധകര്‍. ബി.സി.സി.ഐയുടെ രാജീവ് ശുക്ലയുടെ പരാമര്‍ശമാണ് ദേശീയമാദ്ധ്യമങ്ങള്‍ വാര്‍ത്തയാക്കിയിരിക്കുന്നത്. കഴിഞ്ഞ ദിവസമാണ് ധോണി ഇന്‍സ്റ്റാഗ്രാമിലൂടെ തന്റെ വിരമിക്കല്‍ പ്രഖ്യാപനം നടത്തിയത്. യു.എ.ഇയില്‍ നടക്കാനിരിക്കുന്ന 2020 സീസണിലെ ഐ.പി.എല്‍ മത്സരങ്ങളിലൂടെ ധോണി വമ്പന്‍തിരിച്ചുവരവ് നടത്തുമെന്ന പ്രതീക്ഷ തകര്‍ത്തുകൊണ്ടാണ് വിരമിക്കല്‍ പ്രഖ്യാപനം നടന്നത്. ഇതിനിടെ ധോണിയുടെ സംസ്ഥാനമായ ജാര്‍ഖണ്ഡ് മുഖ്യമന്ത്രി ഹേമന്ദ് സോറന്‍ ധോണിയ്‌ക്കായി വിടവാങ്ങള്‍ മത്സരം നടത്തണമെന്ന് ബി.സി.സി.ഐയോട് ആവശ്യപ്പെട്ടിരുന്നു. എന്നാല്‍ ധോണി തനിക്കായി ഒരു മത്സരം വേണമെന്ന ആവശ്യം ഉന്നയിച്ചിട്ടില്ലെന്ന മറുപടിയാണ് നിലവില്‍ ചര്‍ച്ചയായത്.
വിരമിക്കുന്ന താരങ്ങളാരും തങ്ങള്‍ക്കായി വിടവാങ്ങള്‍ മത്സരം സ്വയം ആവശ്യപ്പെടാ റില്ലെന്നാണ് ആരാധകര്‍ പ്രതികരിച്ചത്. ഇന്ത്യന്‍ ക്രിക്കറ്റിന് രണ്ടു ലോകകിരീടങ്ങളും ഒരു ചാമ്പ്യന്‍സ് ട്രോഫിയും നേടിത്തന്ന ധോണിയെ ബി.സി.സി.ഐ അവഗണിക്കുക യാണെന്നുമാണ് സമൂഹമാദ്ധ്യമങ്ങളില്‍ പരക്കുന്ന വിമര്‍ശനം. 2014ല്‍ ടെസ്റ്റ് ക്രിക്കറ്റില്‍ നിന്ന് ധോണി വിരമിക്കല്‍ പ്രഖ്യാപിച്ചിരുന്നു.
2004ലാണ് ധോണി അന്താരാഷ്‌ട്രക്രിക്കറ്റിന്റെ ഭാഗമായത്. ധോണിയുടെ വരവ് വലിയ മാറ്റമാണ് ടീമിലുണ്ടാക്കിയത്. ശക്തമായ പോരാട്ടവീര്യം സഹതാരങ്ങളിലേയ്‌ക്ക് പകരാന്‍ ധോണിയ്‌ക്കായി. അതേസമയം കളിക്കളത്തില്‍ അക്ഷോഭ്യനായി നില്‍ക്കാറുള്ള ധോണി ക്യാപ്റ്റന്‍ കൂള്‍ എന്ന പേരും നേടിയെടുത്തു. ലോകക്രിക്കറ്റിലെ ബാറ്റിംഗ് മികവില്‍ ഏറ്റവും മികച്ച ഫിനിഷറെന്ന പേരും ധോണിയുടെ പേരിലാണ്. 600 ദിവസം തുടര്‍ച്ചയായി ഇന്ത്യ ലോകഒന്നാം നമ്പര്‍ ടെസ്റ്റ് ടീമായി നിന്നത് ധോണിയുടെ കീഴില്‍ 2009-2010 കാലഘട്ടത്തിലാണ്. 21 ടെസ്റ്റുകളാണ് സ്വന്തം മണ്ണില്‍ ധോണി ഇന്ത്യയ്‌ക്കായി നേടിത്തന്നത്. വ്യക്തിഗത മികവില്‍ ലോകക്രിക്കറ്റില്‍ 195 സ്റ്റംപിംഗുമായി ധോണി നേട്ടം കൊയ്തു.
