ദുബായ്: കളിനിയമങ്ങളില് മാറ്റങ്ങള് ആവശ്യമായി വരുമെന്ന് അന്താരാഷ്ട്ര ക്രിക്കറ്റ് കൗണ്സില്. നിലവിലെ മഴനിയമവും വെളിച്ചക്കുറവ് നിയമവുമാണ് വീണ്ടും പരിശോധിക്കാന് തീരുമാനിച്ചിരിക്കുന്നത്. ഇംഗ്ലണ്ട്-പാകിസ്താന് ടെസ്റ്റ് പരമ്പരയിലെ രണ്ടാം ടെസ്റ്റില് രണ്ടുദിവസവും വെളിച്ചക്കുറവും മഴയും വില്ലനായതാണ് ഐ.സി.സിയുടെ ചിന്തയ്ക്ക് കാരണം. അമ്പയര്മാര് അകാരണമായി വെളിച്ചക്കുറവെന്ന പേരില് തീരുമാനം എടുക്കുന്നുവെന്ന ആരോപണമാണ് ഉയര്ന്നിരിക്കുന്നത്. കഴിഞ്ഞ മാസം നടന്ന വെസ്റ്റിന്ഡീസുമായുള്ള ഇംഗ്ലീഷ് പരമ്പരയിലും സമാന സാഹചര്യം ഉണ്ടായതായി താരങ്ങള് പരാതിപ്പെട്ടിരുന്നു.
മഴപെയ്ത് തോര്ന്ന ശേഷം എപ്പോള് കളി പുന:രാരംഭിക്കണമെന്നതില് നിബന്ധനകളില്ല. അമ്പയര്മാരുടെ വ്യക്തിപരമായ തീരുമാനമാണ് കളിയെ സ്വാധീനിക്കുന്നത്. ഇതില് മാറ്റം വരണമെന്നാണ് പരക്കെ ആവശ്യം ഉയര്ന്നിരിക്കുന്നത്. 11.15ന് മഴമാറിയിട്ടും ഉച്ചയ്ക്ക് 3.20 വരെ കളി തുടങ്ങാഞ്ഞത് വലിയ ക്ഷീണമായെന്ന് ഇരുടീമുകളുടെ താരങ്ങളും പരാതി പറഞ്ഞിരിക്കുകയാണ്.
ഈര്പ്പം പിച്ചിനെ ബാധിക്കാത്തിടത്തോളം കളി പുനരാരംഭിക്കാന് അനുവദിക്കണമെന്നാണ് കളിക്കാര് പറയുന്നത്. ടെസ്റ്റ് മത്സരങ്ങളില് പിങ്ക് നിറത്തിലുള്ള പന്തുകള് ഉപയോഗിച്ചുകൂടെ എന്ന ചോദ്യവും ഉയര്ന്നിരിക്കുകയാണ്. സൈറ്റ് സ്ക്രീന് മാറ്റേണ്ടി വരുമെന്ന പ്രശ്നമാണ് അതിനെതിരെ ചൂണ്ടിക്കാട്ടുന്ന സാങ്കേതിക തടസ്സം.
