ലിസ്ബണ്‍: ചാമ്പ്യന്‍സ് ലീഗില്‍ ചരിത്രഫൈനലിന്റെ ഭാഗമാകാന്‍ നെയ്മറിന് സാധിക്കുമോ എന്ന് ഇന്നറിയാം. ഇന്നലെ നടന്ന സെമിഫൈനല്‍ മത്സരത്തിന് ശേഷം ലീപ്‌സിഗ് താരം മാര്‍സെല്‍ ബാള്‍സ്റ്റെന്‍ബര്‍ഗുമായി നെയ്മര്‍ ജഴ്‌സി ഊരി കൈമാറിയതാണ് വിനയായിരിക്കുന്നത്. ലീപ്‌സിഗിനെ എതിരില്ലാത്ത മൂന്നു ഗോളുകള്‍ക്കാണ് പി.എസ്.ജി തകര്‍ത്തത്. നെയ്മറും എംബാപ്പേയും നല്‍കിയ മികച്ച പിന്തുണയാണ് ടീമിലെ മറ്റ് താരങ്ങള്‍ക്ക് ഗോളടിക്കാനുള്ള അവസരം ഒരുക്കിയത്.
ആദ്യമായി ഫൈനലിലേയ്‌ക്ക് എത്തിയതിന്റെ ആഹ്ലാദപ്രകടനം മൈതാനത്ത് നടത്തുന്നതിനിടെയാണ് നെയ്മര്‍ ജഴ്‌സി കൈമാറിയത്. സാധാരണഗതിയില്‍ നടക്കാറുള്ള ഈ പ്രവൃത്തി പക്ഷെ കൊറോണ കാലത്ത് വിലക്കിയ ഒന്നാണ്. കൊറോണ നിയമപ്രകാരം അത്തരം ഒരു കാര്യങ്ങളും താരങ്ങള്‍ ചെയ്യരുതെന്ന ചാമ്പ്യന്‍സ് ലീഗിലെ ചട്ടമാണ് നെയ്മര്‍ തെറ്റിച്ചത്. കൊറോണ പ്രോട്ടോക്കോള്‍ പ്രകാരം ഇത്തരം നിയമലംഘനങ്ങള്‍ക്ക് 12 ദിവസം ക്വാറന്റൈന്‍ നിര്‍ബന്ധമാണെന്ന് യുവേഫാ മുന്നേ തീരുമാനിച്ചിരുന്നു.
പി.എസ്.ജിയുടെ ചരിത്ര ഫൈനലാണ് 24-ാം തീയതി നടക്കാനിരിക്കുന്നത്. ടീമിലെ നിര്‍ണ്ണായക താരമായ നെയ്മറുടെ ഭാഗത്തുനിന്നും ഇത്തരം ഒരു അബദ്ധം പറ്റിയതിന്റെ അമ്പരപ്പിലാണ് ക്ലബ്ബ് അധികൃതര്‍. ലയേണും ബയേണ്‍ മ്യൂണിച്ചും തമ്മില്‍ നാളെ നടക്കുന്ന രണ്ടാം സെമിയിലെ വിജയിയെയാണ് നെയ്മറുടെ ടീം നേരിടുക. അതിനിര്‍ണ്ണായക മത്സരത്തില്‍ നെയ്മര്‍ക്ക് കളിക്കാനായില്ലെങ്കില്‍ എതിരാളികള്‍ക്ക് അതില്‍പ്പരം ഒരാശ്വാസം കിട്ടാനില്ല.
