വാനിലക്കും കുങ്കുമ പൂവിനും ശേഷം വിപണിയിൽ വളരെയധികം മൂല്യമുള്ള ഒന്നാണ് സുഗന്ധവ്യഞ്ജനങ്ങളുടെ റാണി എന്നറിയപ്പെടുന്ന ഏലക്ക . സംസ്‌കൃതത്തിൽ “ഏല ” എന്നറിയപ്പെടുന്ന ഏലക്ക പുരാതന കാലം മുതലേ ഉപയോഗിച്ച് പോരുന്ന ഔഷധ ഗുണമുള്ള സുഗന്ധവ്യഞ്ജനമാണ് .
ലോകത്ത് ഏറ്റവും കൂടുതൽ ഏലക്ക കൃഷി ചെയ്യുന്നത് ഗ്വാട്ടിമാലയിൽ ആണ് രണ്ടാമത് ഭാരതത്തിലും , ഏറ്റവും കൂടുതൽ ഏലം ഉല്പാദിപ്പിക്കുന്ന സംസ്ഥാനം കേരളമാണ്.തണലും , തണുത്ത കാലാവസ്ഥയും ഉള്ള പ്രദേശങ്ങളിൽ ആണ് ഏലക്ക ഏറ്റവും നന്നായി വളരുന്നത് .
ആദ്യകാല നാഗരികതയിൽ ഒന്നായ സുമറിനെ കുറിച്ചുള്ള ഗ്രന്ഥങ്ങളിലും , ഭാരതത്തിലെ ആയുർവേദ ഗ്രന്ഥങ്ങളിലും ഏലത്തെ കുറിച്ചുള്ള പരാമർശമുണ്ട് . ഇതിൽ നിന്ന് പുരാതന കാലം മുതൽക്കേ ആയുർവേദചികിത്സ വിധികളിലും പാചക കൂട്ടുകളിലും ഏലക്ക ഉപയോഗിച്ച് പോന്നിരുന്നു എന്ന് മനസിലാക്കാൻ സാധിക്കും .
കായ്കളുടെ ആകൃതി , വലിപ്പം, വളരുന്ന പ്രദേശം എന്നിവയെ അടിസ്ഥാനമാക്കി മലബാർ , മൈസൂർ , വഴുക്ക എന്നിങ്ങനെ മൂന്ന് തരത്തിലുള്ള ഏലക്കയാണ് കേരളത്തിൽ കൂടുതലായി കൃഷി ചെയ്തു പോരുന്നത് . ഭാരതത്തിലെ പല കാർഷിക സർവ്വകലാശാലകളുടെയും കീഴിൽ കൂടുതൽ ഗുണവും മേന്മയുമുള്ള ഏല്ലക്കയുടെ പല ഇനങ്ങൾ വികസിപ്പിച്ചെടുത്തിട്ടുണ്ട് .
സുഗന്ധവും രുചിയുമുള്ള ഏലക്ക ഭാരതത്തിന്റെ രുചിക്കൂട്ടുകളിൽ ഒഴിച്ച് കൂട്ടാനാവാത്ത ഒന്നാണ് . മസാല കൂട്ടുകൾ തൊട്ട് മധുര പലഹാരങ്ങളിൽ വരെ ഏലക്ക സജീവ സാന്നിധ്യമാണ് . സുഗന്ധത്തോടൊപ്പം തന്നെ ഏറെ ഔഷധ മൂല്യം ഉള്ള ഒന്നാണ് ഏലക്ക . പനി , വാതം , പിത്തം , കഫം എന്നിവക്ക് നല്ലൊരു ഔഷധമാണ് ഏലക്ക .
ഏല്ലക്കയിൽ ധാരാളം ആന്റിഓക്സിഡന്റുകൾ അടങ്ങിയിരിക്കുന്നതിനാൽ രക്തസമ്മർദ്ദം കുറക്കാൻ സഹായിക്കും . ദഹനപ്രശ്‌നങ്ങൾ ഒഴിവാക്കാനും , ശ്വാസത്തിലെ ദുർഗന്ധം അകറ്റാനും , വായ്പുണ്ണ് തുടങ്ങിയ അസുഖങ്ങൾ ഒഴിവാക്കാനും ഏലക്ക കഴിക്കുന്നത് നല്ലതാണ് .
ദിനവും ഏലക്ക ഇട്ട ചായ കുടിക്കുന്നത് ശരീരത്തിൽ അടിഞ്ഞു കൂടുന്ന വിഷാംശങ്ങൾ ഒഴുക്കി കളയാനും തന്മൂലം കൂടുതൽ ഊർജസ്വലരാകാനും ആരോഗ്യം നിലനിർത്താനും സഹായിക്കും .
