ശിവക്ഷേത്രത്തിലും അയ്യപ്പ ക്ഷേത്രത്തിലും നടത്തി വരുന്ന ഒരു പ്രധാന വഴിപാടാണ് നീലാഞ്ജനം. കലിയുഗ വരദനും ശനിദോഷം നിവാരണം ചെയ്യുന്നതുമായ ശ്രീ ധര്മ്മ ശാസ്താവിന്റെ നടയിലാണ് നീലാഞ്ജനം കഴിപ്പിക്കുന്നത്. ശനിയുടെ ദോഷങ്ങളായ ഏഴരശനി, കണ്ടകശനി, ജന്മശനി, അഷ്ടമശനി തുടങ്ങിയ വിവിധ തരത്തിലുള്ള ദോഷങ്ങള് ഇല്ലായ്മ ചെയ്യാന് ശിവക്ഷേത്രത്തില് ശാസ്താവിന്റെ നടയിലും അയ്യപ്പ ക്ഷേത്രത്തിലും നീലാഞ്ജനം കഴിപ്പിക്കാവുന്നതാണ്. ശ്രീ ധര്മ്മ ശാസ്താ ക്ഷേത്രത്തിലോ ശിവക്ഷേത്രത്തിലോ ആണ് പ്രധാനമായും നീലാഞ്ജനം കഴിപ്പിക്കുന്നത്.
ഒരു മനുഷ്യന്റെ ജീവിത ചക്രത്തില് ഏറ്റവും മോശപ്പെട്ട ദശയായിട്ടാണ് ശനിദശയെ പൊതുവെ പറയാറുളളത്. ശനി ദോഷം ഇല്ലാതാക്കുന്നതിനായി ചെയ്യേണ്ട വഴിപാടുകളില് ഏറ്റവും ലളിതവും ഫലപ്രദവുമായ ഒരു വഴിപാടാണ് നീലാഞ്ജനം. ശനിയാഴ്ചകളിലാണ് പ്രധാനമായും ഈ വഴിപാട് നടത്തേണ്ടത്. മാസം തോറും ജന്മ നക്ഷത്രത്തില് തുടര്ച്ചയായി നീലാഞ്ജനം കഴിപ്പിക്കുന്നതും വളരെ ഉപകാരപ്രദവും ഫല പ്രദവുമാണ്. നമ്മളിലുള്ള ശനി ദോഷങ്ങളെ അകറ്റാന് ഇത് ഏറെ സഹായിക്കുന്നു.
നാളികേരം രണ്ടായി ഉടച്ച് അതിലെ വെള്ളം മുഴുവനായി കളഞ്ഞ ശേഷം അതില് നിറയെ നല്ലെണ്ണ ഒഴിച്ച് തിരി വെച്ച് കത്തിച്ച ശേഷം ധര്മ്മശാസ്താവിന്റെ മുന്നില് ആരതി ഉഴിയുകയും ശാസ്താവിനു മുന്നില് മുക്കാല് മണിക്കൂറോളം ദീപം കത്തിച്ച് വയ്ക്കുകയും ചെയ്യുന്നതാണ് നീലാഞ്ജനം. ശനിദോഷ നിവാരണത്തിനുള്ള മന്ത്രങ്ങളാണ് ആ സമയത്ത് നമ്മള് ഉരുവിടേണ്ട്. ശനിയുടെ പ്രാധാന്യമുള്ള ഒരു ധാന്യമാണ് എളള്. അതുകൊണ്ടു തന്നെ നീലാഞ്ജനത്തിനു പുറമേയായി എളള് തിരി കത്തിക്കുന്നതും ശനിയുടെ ദോഷങ്ങള് ഇല്ലാതാക്കാന് ഏറ്റവും നല്ലതാണ്. നീലാഞ്ജനത്തിനായി എളെളണ്ണ മാത്രമേ ഉപയോഗിക്കാന് പാടുകയുളളൂ.
Comments