വലുതും ധാരാളം മുറികളും അത്യാധുനിക സൗകര്യങ്ങളും ഉള്ള വീടാണ് ഏവരും ആഗ്രഹിക്കുന്നതും സ്വപ്നം കാണുന്നതും . എന്നാൽ അത്തരത്തിലുള്ള വീട് എന്ന മോഹം കൊണ്ട് നടക്കുന്നവർ പോലും ഈ കൊച്ചു മരം കൊണ്ടുള്ള വീട് കണ്ടു കഴിഞ്ഞാൽ അറിയാതെ തന്നെ അതിനെ പ്രണയിച്ചു പോവുകയും അവിടെ താമസിക്കാൻ കൊതിച്ചു പോവുകയും ചെയ്യും . അത്രയും മനോഹരമായിട്ടാണ് ഈ വീട് നിർമ്മിച്ചിട്ടുള്ളത് .
ദി ലിറ്റിൽ ലോഗ് ഹൗസ് എന്ന കമ്പനിയാണ് മരം കൊണ്ടുള്ള ഇത്രയും കൊച്ചു വീട് നിർമ്മിച്ചിരിക്കുന്നത് . പുറമെ നിന്ന് നോക്കിയാൽ തടി കൊണ്ടുള്ള ഒരു കുടിൽ എന്ന പ്രതീതി ഉളവാക്കുന്ന ഈ കൊച്ചു വമ്പന്റെ ഉൾഭാഗം ഒരുക്കിയിരിക്കുന്നത് ആരെയും വിസ്മരിപ്പിക്കുന്ന തരത്തിലാണ് .
ഈ വീടിന്റെ മുറികൾ എല്ലാം തന്നെ തടി കൊണ്ടാണ് നിർമ്മിച്ചിരിക്കുന്നത് . ചെറിയ വീടാണെങ്കിലും താമസിക്കാൻ വേണ്ടുന്ന എല്ലാ സൗകര്യങ്ങളും ഒരുക്കിയിട്ടുള്ള ഈ വീടിന്റെ പടികെട്ടുകൾക്കു പഴമയുടെ പ്രതീതി ഉളവാക്കുവാൻ വേണ്ടി പല ആകൃതിയിലും വലുപ്പത്തിലുമുള്ള തടികൾ ഉപയോഗിച്ചാണ് നിർമിച്ചിരിക്കുന്നത് .
അധികം വലിപ്പമില്ലാതെ ഒരുക്കിയിരിക്കുന്ന ഭംഗിയുള്ള ചെറിയ അടുക്കളയിൽ കൊച്ചു കൊച്ചു പാത്രങ്ങൾ ഉപയോഗിച്ച് സ്നേഹം നിറച്ചു പാചകം ചെയ്യാൻ സാധിക്കും, ഒപ്പം കൂട്ടുകാർക്കോ വീട്ടുകാർക്കോ ഒരുമിച്ചിരുന്ന് ഭക്ഷണം ആസ്വദിക്കാൻ പറ്റുന്ന ഊണ് മുറിയും ഈ കൊച്ചു വീട്ടിൽ സജ്ജീകരിച്ചിട്ടുണ്ട് .
വീടിന്റെ മുകളിലേക്ക് ചെന്നാൽ മരങ്ങൾ നിറഞ്ഞ പ്രദേശത്തേക്ക് ദർശനം തരുന്ന കൊച്ചു ബാൽക്കണിയുണ്ട് . വീടിനുള്ളിലെ എല്ലാ മുറികളിലെയും പോലെ കുളിമുറിയും ചെറുതാണെങ്കിലും ആവശ്യങ്ങൾ നിറവേറ്റാൻ പര്യാപ്തമാണ് . താഴത്തെ നിലയെക്കാൾ തടികളുടെ ഭംഗി കൂടുതലായി പ്രയോജന പെടുത്തിയിട്ടുള്ളത് മുകൾ നിലയിലാണ് . ധാരാളം വെളിച്ചം കയറുന്ന സുഖപ്രദമായ കിടപ്പുമുറി , മഴയും മഞ്ഞുമുള്ള രാത്രികളിൽ പുതച്ചു മൂടി കിടന്ന് ഉറങ്ങാൻ തോന്നിപ്പിക്കും വിധം മനോഹരമാണ് .
ചെറിയ വസ്തുക്കൾ എന്നും മനുഷ്യരെ ആകർഷിക്കുന്ന ഒന്നാണ് അതുപോലെ തന്നെ വലിയ കൊട്ടാരത്തിനുള്ളിൽ ശ്വാസം മുട്ടി ജീവിക്കുന്നതിനേക്കാൾ എത്രയോ ആനന്ദകരമായിരിക്കും ചെറുതെങ്കിലും സുഖപ്രദവും ആനന്ദവും നൽകുന്ന ഈ കൊച്ചു മരം കൊണ്ടുള്ള വീട്ടിലെ താമസം .
