സോഷ്യല്‍മീഡിയയില്‍ വൈറലായി ഒരുമിച്ച് ഓടുന്ന രണ്ട് ജിറാഫുകളുടെ വീഡിയോ . നിങ്ങള്‍ കണ്ടതില്‍ വെച്ച് ഏറ്റവും മനോഹരമായ വീഡിയോകളില്‍ ഒന്നായിരിക്കും ഈ വീഡിയോ എന്ന തലക്കെട്ടോടു കൂടിയാണ് ഇത് സോഷ്യല്‍മീഡിയയില്‍ വൈറലാവുന്നത്. യുഎസിലെ ഒഹ്യോയിലെ സിന്‍സിനാറ്റി മൃഗശാലയുടെ ഒദ്യോഗിക ട്വിറ്റര്‍ പേജിലാണ് ഈ വീഡിയോ പോസ്റ്റ് ചെയ്തത്. തിയോ എന്ന കുഞ്ഞ് ജിറാഫ് കളിസ്ഥലത്ത് സന്തോഷത്തോടെ ഓടിച്ചാടി നടക്കുന്നതാണ് വീഡിയോയില്‍. തിയോയുടെ മൂത്ത സഹോദരന്‍ ഫെന്നും ഒപ്പമുണ്ട്. ‘ബേബി ജിറാഫ് തിയോ അത്യധികം ഉത്സാഹത്തിലാണ്, ജ്യേഷ്ഠന്‍ ഫെന്നും ഇതിനൊപ്പം ചേര്‍ന്നു’ എന്നാണ് സിന്‍സിനാറ്റി സൂ വീഡിയോ ഷെയര്‍ ചെയ്ത് കുറിച്ചത്.
Baby giraffe Theo is full of energy! Even older brother Fenn gets in on the fun run! pic.twitter.com/43hYxpMTHM
— Cincinnati Zoo (@CincinnatiZoo) September 9, 2020
ട്വിറ്ററില്‍ പോസ്റ്റ് ചെയ്ത വീഡിയോ ഇതിനോടകം 15000 ത്തിലധികം പേര്‍ കണ്ടു കഴിഞ്ഞു. നൂറ് കണക്കിനാളുകള്‍ കമന്റുകളറിയിച്ച് വീഡിയോയ്‌ക്ക് ആയിരത്തിലധികം ലൈക്കുകളും ലഭിച്ചു. നിരവധി പേര്‍ വീഡിയോ ഷെയര്‍ ചെയ്യുകയും ചെയ്തു. അവന്‍ സുന്ദരനാണെന്നാണ് ഒരാള്‍ വീഡിയോയ്‌ക്ക് കമന്റിട്ടത്. അതേസമയം ‘റേസ് വേണോ വരൂ’ എന്നാണ് മറ്റൊരാള്‍ കുറിച്ചത്. ‘ഈ വീഡിയോ എന്റെ ദിവസം മനോഹരമാക്കി’ , ഇവന്‍ ശരിക്കും ഒരു കുഞ്ഞാണ്. ഒരു കുട്ടിയുടെ എല്ലാ കുസൃതിയും അവനിലുണ്ട്’, ‘മനോഹരം’ തുടങ്ങി നിരവധി കമന്റുകളാണ് വീഡിയോയ്‌ക്ക് ലഭിക്കുന്നത്.
മൃഗങ്ങളുടെ ഇത്തരത്തിലുള്ള ഉല്ലാസ തിമിര്‍പ്പുകള്‍ സിന്‍സിനാറ്റി സൂ വീഡിയോ പകര്‍ത്തി സോഷ്യല്‍ മീഡിയയില്‍ പോസ്റ്റ് ചെയ്യാറുണ്ട്. അതേസമയം മൃഗസ്‌നേഹികള്‍ ഇത്തരം വീഡിയോകള്‍ ഏറ്റെടുക്കാറുമുണ്ട്. അടുത്തിടെ 12 വര്‍ഷമായി വേര്‍പിരിഞ്ഞതിന് ശേഷം ഒരു മുത്തശ്ശി ആന മകളെയും ചെറുമകളെയും കണ്ടുമുട്ടിയ ചിത്രങ്ങള്‍ മൃഗസ്‌നേഹികള്‍ ഏറ്റെടുത്തിരുന്നു. ജര്‍മ്മന്‍ നഗരമായ ഹാലെയിലെ ഒരു മൃഗശാലയിലാണ് ഈ വികാരനിര്‍ഭരമായ കണ്ടുമുട്ടലുണ്ടായത്.
