ഷാർജ : ടീമിലെ സീനിയർ താരം സുരേഷ് റെയ്ന ചെന്നൈ സൂപ്പർ കിംഗ്സിലേക്ക് ഈ സീസണിൽ മടങ്ങിയെത്തിയേക്കില്ല. ടീമുമായി അടുത്തുനിൽക്കുന്ന വൃത്തങ്ങളാണ് ഇക്കാര്യം അറിയിച്ചത്. ഇതിനൊപ്പം ലോക ഒന്നാം നമ്പർ ട്വന്റി20 താരത്തെ ടീമിലെത്തിക്കാൻ ചെന്നൈ ശ്രമമാരംഭിച്ചിട്ടുണ്ടെന്ന വാർത്തകളും പുറത്തുവരുന്നുണ്ട്. ഇംഗ്ലണ്ട് ബാറ്റ്സ്മാന് ഡേവിഡ് മലാനായിരിക്കും സുരേഷ് റെയ്നയ്ക്കു പകരം സിഎസ്കെ ടീമില് എത്തിയേക്കുക.
കഴിഞ്ഞ ദിവസമാണ് മലാൻ ഐസിസി ട്വന്റി 20 റാങ്കിങ്ങിൽ ഒന്നാം സ്ഥാനത്തെത്തിയത്. ഇംഗ്ലണ്ടിനായി അവസാനത്തെ രണ്ടു ടി20 പരമ്പരകളിലും മികച്ച പ്രകടനമായിരുന്നു 33 കാരനായ താരം കാഴ്ച്ചവച്ചത്. പാകിസ്ഥാന്, ഓസ്ട്രേലിയ എന്നിവര്ക്കെതിരെ നടന്ന ടി20 പരമ്പരയിര് തകര്പ്പന് പ്രകടനമാണ് താരം പുറത്തെടുത്തത്. തുടർന്നാണ് പാക് നായകൻ ബാബർ അസമിനെ മറികടന്ന് മലാൻ ഒന്നാമതെത്തിയത്.
മൂന്നാം നമ്പര് പൊസിഷനില് മികച്ച പ്രകടനമാണ് മലാന് കാഴ്ചവച്ചു കൊണ്ടിരിക്കുന്നത്. അന്താരാഷ്ട്ര ടി20യില് 16 മല്സരങ്ങള് കളിച്ചിട്ടുള്ള അദ്ദേഹത്തിന്റെ സമ്പാദ്യം 682 റണ്സാണ്. നിലവിലെ മികച്ച ഫോം, റെയ്നയെപ്പോലെ മൂന്നാം നമ്പര് ബാറ്റ്സ്മാന്, റെയ്നയെപ്പോലെ ഇടംകൈയന് ബാറ്റ്സ്മാന് തുടങ്ങിയ ഘടകങ്ങൾ മലാനെ ടീമിലെത്തിക്കാൻ സിഎസ്കെയെ പ്രേരിപ്പിക്കുന്നു.
