ന്യൂയോര്ക്ക്: യു.എസ്.ഓപ്പണ് ചരിത്രത്തില് പുതുമുഖങ്ങളായ രണ്ടു ഫൈനലിസ്റ്റുകള് പിറന്നു. സെമിഫൈനലില് രണ്ടാം സീഡായ ഡോമിനിക് തീം മൂന്നാം സീഡ് മെഡ് വേദേവിനെ തോല്പ്പിച്ചപ്പോള് രണ്ടാം സെമിയില് പാബ്ലോ കാരാനോ ബുസ്റ്റയെ തകര്ത്ത് അഞ്ചാം സീഡ് അലക്സാണ്ടര് വെരേവും ഫൈനലില് കടന്നു. ഇരുവരും ആദ്യമായാണ് ഒരു ഗ്രാന്ഡ് സ്ലാം ഫൈനലിലെത്തുന്നത്. യു.എസ്.ഓപ്പണ് ചരിത്രത്തില് കിരീട പോരാട്ടത്തിനിറങ്ങുന്ന ആദ്യ ഓസ്ട്രിയന് പുരുഷ താരമായി തീം മാറി.
മെഡ് വേദേവിനെതിരെ ശക്തമായ പോരാട്ടമാണ് തീം സെമിയില് പുറത്തെടുത്തത്. ആദ്യ സെറ്റ് അനായാസം 6-2ന് സ്വന്തമാക്കിയെങ്കിലും രണ്ടും മൂന്നൂം സെറ്റുകള് ടൈബ്രേക്കറിലേക്ക് എത്തിക്കാന് മൂന്നാം സീഡ് മെഡ്വേദേവിനായി. രണ്ടും മൂന്നും സെറ്റുകള് 7-6 എന്ന സ്കോറിനാണ് തീം പിടിച്ചെടുത്തത്.
രണ്ടാം സെമിയില് അലക്സാണ്ടര് വെരേവ് ബുസ്റ്റക്കെതിരെ മാരത്തോണ് മത്സരത്തിനൊടുവിലാണ് ജയിച്ചത്. ആദ്യ രണ്ടു സെറ്റുകള് 6-3, 6-2ന് കയ്യിലാക്കിയ ബുസ്റ്റയ്ക്കെതിരെ അതിഗംഭീര തിരിച്ചുവരവാണ് വെരേവ് അടുത്ത മൂന്നു സെറ്റുകളിലും നടത്തിയത്. 6-3, 6-4, 6-3 എന്നീ നിലയിലാണ് വെരേവ് ഫൈനലില് ഇടംനേടിയത്.നാളെയാണ് ഫൈനല് പോരാട്ടം നടക്കുന്നത്. 2014ല് മാറിന് സിലിച്ചിന് ശേഷം ആദ്യമായി ഒരു ഗ്രാന്ഡ് സ്ലാം കിരീടമാണ് ഫൈനലിസ്റ്റുകളെ കാത്തിരിക്കുന്നത്. റഫേല് നദാല് കൊറോണ മൂലവും ഫെഡറര് കാല്മുട്ടിലെ പരിക്കുമൂലവും കളിക്കാതിരുന്ന യു.എസ്.ഓപ്പണില് കിരീട സാദ്ധ്യത കല്പ്പിക്കപ്പെട്ട ജോക്കോവിച്ച് പെരുമാറ്റ ദൂഷ്യത്തിന്റെ പേരില് അയോഗ്യനായതോടെയാണ് പുതുമുഖങ്ങള്ക്ക് സാധ്യത തെളിഞ്ഞത്.
Comments