ന്യൂഡല്ഹി: ഇന്ത്യന് ക്രിക്കറ്റ് ആരാധകര്ക്ക് ഒരിക്കലും മറക്കാനാവാത്ത ദിവസമാണ് 2007 സെപ്റ്റംബര് 19. പ്രഥമ ട്വന്റി20 ലോകകപ്പ് ക്വാര്ട്ടര് ഫൈനലില് ഇംഗ്ലണ്ടിന്റെ സ്റ്റുവര്ട്ട് ബ്രോഡിനെതിരെ ഒരു ഓവറില് അടിച്ചു കൂട്ടിയ ആ ആറ് സിക്സറുകള് പിറന്നിട്ട് ഇന്നേക്ക് 13 വര്ഷം പൂര്ത്തിയായിരിക്കുന്നു. യുവരാജ് സിംഗിന്റെ മാസ്മരിക പ്രകടനത്തെ അഭിനന്ദിച്ച് ഐസിസി ട്വിറ്ററില് ആ മത്സരത്തിന്റെ വീഡിയോ പോസ്റ്റ് ചെയ്തിട്ടുണ്ട്. ഇതോടെ ട്വന്റി20യില് ഒരു ഓവറില് ആറ് സിക്സറുകള് അടിച്ച ആദ്യ ക്രിക്കറ്റ് കളിക്കാരനായി യുവരാജ് സിംഗ്.
ദക്ഷിണാഫ്രിക്കയില് നടന്ന പ്രഥമ ട്വന്റി20 ലോകകപ്പില് സെമി ഫൈനലിലെത്താന് ഇംഗ്ലണ്ടിനെതിരെ വിജയത്തില് കുറഞ്ഞൊന്നും ഇന്ത്യക്ക് ചിന്തിക്കാന്പോലും ആകുമായിരുന്നില്ല. ആവേശം വാനോളമുയര്ത്തിയ മത്സരത്തില് ഇംഗ്ലണ്ട് ഓള്റൗണ്ടര് ആന്ഡ്രൂ ഫ്ളിന്റോഫും യുവരാജ് സിംഗും തമ്മില് വാക്കേറ്റമുണ്ടായത് ഇന്നലെ കഴിഞ്ഞതുപോലെ ആരാധകരുടെ മനസിലുണ്ട്. തൊട്ടടുത്ത ഓവറില് സ്ട്രൈക്ക് ലഭിച്ച യുവരാജ് സ്റ്റുവര്ട്ട് ബ്രോഡിനെ തലങ്ങും വിലങ്ങും പായിച്ചപ്പോള് നിസ്സഹായനായി നോക്കി നില്ക്കാനേ ഫ്ളിന്റോഫിനായുള്ളൂ.
18-ാം ഓവറിന്റെ അവസാനത്തില് 171/3 എന്ന നിലയിലായിരുന്നു ഇന്ത്യ. യുവരാജിനൊപ്പം നായകന് എം.എസ്.ധോണിയായിരുന്ന മറുഭാഗത്തുണ്ടായിരുന്നത്. ഈ ഓവറില് യുവി ഫ്ളിന്റോഫിനെതിരെ രണ്ട് ബൗണ്ടറികള് നേടിയിരുന്നു. ഇതോടെ ബാറ്റ്സ്മാനെ പ്രകോപിപ്പിക്കുക എന്ന തന്ത്രം ഫ്ളിന്റോഫും സ്വീകരിച്ചു. എന്നാല് ഇതിന് ഇരയാകേണ്ടി വന്നത് സ്റ്റുവര്ട്ട് ബ്രോഡായിരുന്നു എന്നു മാത്രം.
ആദ്യ പന്ത് ഡീപ്പ് മിഡ് വിക്കറ്റിനു മുകളിലൂടെ. രണ്ടാമത്തേത് ബാക്വേഡ് സ്ക്വയര് ലെഗിന് മുകളിലൂടെയുള്ള മനോഹരമായ ഫ്ളിക്ക്. വൈഡ് ലോംഗ് ഓഫിന് മുകളിലൂടെ മൂന്നാം സിക്സറും പറന്നതോടെ ഇംഗ്ലണ്ട് അപകടം മണത്തു. എന്നാല് യുവി തൃപ്തനായിരുന്നില്ല. ഓഫ് സൈഡിലേക്കെത്തിയ ഫുള്ടോസ് ഡീപ് പോയിന്റിന് മുകളിലൂടെ കാണികള്ക്കിടയിലെത്തി. ആഞ്ചാം പന്ത് സ്ക്വയര് ലെഗിലേക്ക്. കിംഗ്സ്മെഡിലെ കാണികള് ആവേശത്തിലായി. അവസാന പന്ത് വൈഡ് ലോഗ് ഓണിന് മുകളിലൂടെ പറന്നതോടെ കുട്ടിക്ക്രിറ്റില് ഒരു പിടി റെക്കോര്ഡുകളാണ് പിറന്നത്.
ട്വന്റി20 ക്രിക്കറ്റിലെ വേഗമേറിയ അര്ദ്ധ സെഞ്ച്വറിക്കും യുവരാജ് അര്ഹനായി. 12 പന്തിലാണ് താരം 50 അടിച്ചത്. മൊത്തം 4 ബൗണ്ടറികളും 6 സിക്സറുകളും ആ ബാറ്റില് നിന്നും പിറന്നു. വെറും 16 പന്തില് 58 റണ്സ് കുറിച്ച യുവരാജിന്റെ പ്രകടനം മത്സരത്തില് നിര്ണ്ണായകമായി. ഇന്ത്യ 20 ഓവറില് 4 വിക്കറ്റ് നഷ്ടത്തില് 218 റണ്സ് കുറിച്ചപ്പോള് ഇംഗ്ലണ്ട് 18 റണ്സ് അകലെ വീണതോടെ ഇന്ത്യ പ്രഥമ ട്വന്റി20 കീരിടം ചൂടുകയായിരുന്നു.
