അബുദാബി: സണ്റൈസേഴ്സ് ഹൈദരാബാദിനെതിരെ കൊല്ക്കത്ത നൈറ്റ് റൈഡേഴ്സിന് 143 റണ്സ് വിജയലക്ഷ്യം. ടോസ് നേടി ആദ്യം ബാറ്റ് ചെയ്ത സണ്റൈസേഴ്സ് നിശ്ചിത 20 ഓവറില് 4 വിക്കറ്റ് നഷ്ടത്തില് 142 റണ്സെടുത്തു. സണ്റൈസേഴ്സിനായി മനീഷ് പാണ്ഡെ അര്ദ്ധ സെഞ്ച്വറി നേടി.
ഓപ്പണര്മാരായ ഡേവിഡ് വാര്ണറും (36) ജോണി ബെയര്സ്റ്റോയും (5) ഒന്നാം വിക്കറ്റില് 24 റണ്സാണ് കുറിച്ചത്. ബെയര്സ്റ്റോയുടെ കുറ്റി തെറുപ്പിച്ച് പാറ്റ് കമ്മിന്സ് കൊല്ക്കത്തയുടെ പ്രതീക്ഷ കാത്തു. മൂന്നാമനായി ക്രീസിലെത്തിയ മനീഷ് പാണ്ഡെ മികച്ച പ്രകടനമാണ് പുറത്തെടുത്തത്. 38 പന്തുകള് നേരിട്ട പാണ്ഡെ മൂന്ന് ബൗണ്ടറികളും രണ്ട് സിക്സറുകളും ഉള്പ്പെടെ 51 റണ്സെടുത്തു. വൃദ്ധിമാന് സാഹ 30ഉം മൊഹമ്മദ് നബി 11 റണ്സും നേടി.
കൊല്ക്കത്തക്കു വേണ്ടി ഏഴ് പേരാണ് ബൗള് ചെയ്തത്. റണ്സ് വിട്ടുകൊടുക്കാന് പിശുക്കു കാണിച്ച പാറ്റ് കമ്മിന്സ് നാല് ഓവറില് 19 റണ്സ് മാത്രം വഴങ്ങി ഒരു വിക്കറ്റ് വീഴ്ത്തി. വരുണ് ചക്രവര്ത്തി, ആന്ദ്രെ റസല് എന്നിവരും ഒരോ വിക്കറ്റ് വീതം സ്വന്തമാക്കി.
