ലണ്ടന്: പി.എസ്.ജിയുടെ മുന്നേറ്റ നിരതാരം എഡിന്സണ് കവാനി ഇംഗ്ലീഷ് നിരയിലേക്ക്. ഫ്രഞ്ച് ലീഗിലെ വമ്പന്മാരായ പി.എസ്.ജിയില് നിന്നാണ് കവാനി ഇംഗ്ലീഷ് പ്രീമിയര് ലീഗിലെ മാഞ്ചസ്റ്റര് യുണൈറ്റഡിലേക്ക് ചേക്കേറുന്നത്. ക്ലബ്ബുമായുള്ള സീസണ് കാലാവധി തീര്ന്നതോടെ യാതൊരു പണമിടപാടു മില്ലാതെ ഫ്രീ ട്രാന്സ്ഫര് വ്യവസ്ഥയിലാണ് മാഞ്ചസ്റ്റര് യുണൈറ്റഡിലേക്ക് കവാനി എത്തുന്നത്.170 കോടിരൂപയ്ക്കാണ് ഒരു വര്ഷത്തെ കരാര് ഒപ്പിട്ടിരിക്കുന്നത്.
കഴിഞ്ഞ ജൂണ്മുതല് കാലാവധി കഴിഞ്ഞ് നില്ക്കുകയായിരുന്നു 33 കാരനായ ഉറുഗ്വേയുടെ സ്റ്റാര് സ്ട്രൈക്കര്. ക്ലബ്ബ് മത്സരങ്ങളില് 556 എണ്ണത്തിലൂടെ 341 ഗോളുകള് നേടിയ താരം പി.എസ്.ജിക്കായി 301 മത്സരങ്ങളിലായി 200 ഗോളുകളെന്ന റെക്കോഡ് നേട്ടവും സ്വന്തമാക്കിയാണ് ക്ലബ്ബ് വിടുന്നത്. 2013-14 സീസണിലാണ് കവാനി പി.എസ്.ജിയിലെത്തുന്നത്. അതിന് മുമ്പ് നാപ്പോളിയുടെ താരമായിരുന്നു. പാലെര്മോയ്ക്ക് വേണ്ടിയും കളിച്ചിട്ടുണ്ട്. ക്ലബ്ബ് മത്സരങ്ങളുടെ തുടക്കം 2005-06ല് ഡാനൂബിയേക്ക് ബൂട്ടണിഞ്ഞു കൊണ്ടായിരുന്നു.
ഒക്ടോബര് 20ന് മാഞ്ചസ്റ്റര് ജഴ്സിയില് കവാനി പി.എസ്.ജിക്കെതിരെ ഇറങ്ങാനാണ് സാധ്യത. ഇതിന് മുമ്പ് പ്രീമിയര് ലീഗിലെ ആദ്യമത്സരത്തില് 17-ാം തീയതി ന്യൂകാസിലെതിരെയായിരിക്കും പുതിയ ക്ലബ്ബിനൊപ്പമുള്ള ആദ്യമത്സരം നടക്കുക.
ലോക ഫുട്ബോളിലെ ഏറ്റവും മികച്ച ഒരു ക്ലബ്ബാണ് മാഞ്ചസ്റ്റര് യുണൈറ്റഡ്. അതിന്റെ ഭാഗമാകാന് സാധിച്ചത് വലിയൊരു ബഹുമതിയായി കാണുന്നു. കളിക്കാതിരുന്ന കഴിഞ്ഞ മാസങ്ങളില് നല്ല പരിശീലനത്തിലായിരുന്നു. ശാരീരികമായി മികച്ച നിലവാരത്തിലാണെന്നും കവാനി പറഞ്ഞു.
