ആന്റി ബാക്ടീരിയൽ, ആന്റി ഏജിങ് എന്നീ ഘടകങ്ങൾ അടങ്ങിയിട്ടുള്ള വെളുത്തുള്ളി പല ചർമ പ്രശ്നങ്ങൾക്കും ഒരു ഉത്തമ പ്രതിവിധിയാണ്. പൊതുവെ ദഹന സംബന്ധമായ കാര്യങ്ങൾക്ക് വെളുത്തുള്ളി ഉപയോഗിക്കാറുണ്ടെങ്കിലും സൗന്ദര്യ സംരക്ഷണങ്ങൾക്ക് വെളുത്തുള്ളി അധികം ഉപയോഗിക്കാറില്ല. എന്നാൽ വെളുത്തുള്ളി ഉപയോഗിച്ച് മുഖക്കുരു ഇല്ലാതാക്കുവാനും, ചർമ്മത്തിന് ഉണ്ടാകുന്ന അലർജി അകറ്റുവാനും സാധിക്കും. ചർമ്മത്തിന് ഉണ്ടാകുന്ന ചൊറിച്ചിൽ, ചുവപ്പ്, നിറം മാറൽ തുടങ്ങിയവ തടയുവാൻ വെളുത്തുള്ളി സഹായിക്കും. അഞ്ചോ ആറോ വെളുത്തുള്ളിയെടുത്തു അരച്ച് അതിന്റെ നീര് മുഖക്കുരുവുള്ള ഭാഗത്തു പുരട്ടുക. എന്നിട്ട് അല്പസമയത്തിനുള്ളിൽ തന്നെ കഴുകി കളയുക. ഇത് മുഖക്കുരുവിനെ അകറ്റാൻ സഹായിക്കും.
മാത്രവുമല്ല മുഖക്കുരു മൂലമുണ്ടായ പാടുകളും, ചുവപ്പും ഇല്ലാതാക്കുവാനും വെളുത്തുള്ളി നീരിന് സാധിക്കും. അതുപോലെ വെളുത്തുള്ളി നീരിനൊപ്പം തക്കാളിയും ഉടച്ചു ചേർത്താൽ ചർമ്മത്തിൽ അടങ്ങിയിട്ടുള്ള മാലിന്യങ്ങളും അഴുക്കും പൂർണമായി നീക്കം ചെയ്യാൻ സാധിക്കും. മുഖത്ത് ഉണ്ടാകുന്ന പാടുകൾ ഇല്ലാതാക്കാൻ വെളുത്തുള്ളിയും ഒലിവ് ഓയിലും ചേർത്ത് പുരട്ടുക. ദിവസങ്ങൾക്കുള്ളിൽ തന്നെ മുഖത്തുണ്ടാകുന്ന പാടുകൾ മാഞ്ഞു പോകും. പൊടിയും വിയർപ്പും കൊണ്ടുണ്ടാകുന്ന അല്ലർജിയും ചൊറിച്ചിലും ഇല്ലാതാക്കുവാനും വെളുത്തുള്ളി ഉപയോഗിക്കാം.
അതുപോലെ ദിവസേന ഉള്ള പുറത്തുപോകലും അലച്ചിലും ചർമ്മത്തിന് പല ബുദ്ധിമുട്ടുകളും ഉണ്ടാക്കും. മുഖത്തിന് ഉണ്ടാകുന്ന നിറം മാറ്റം, ചൊറിച്ചിൽ, അലര്ജി തുടങ്ങിയവ മിക്ക ആളുകളുടെയും പതിവ് പ്രശ്നങ്ങളാണ്. ഇതിന് ഏറ്റവും എളുപ്പ മാർഗത്തിൽ പരിഹാരം കണ്ടെത്തുവാൻ സാധിക്കുന്ന ഒന്നാണ് വെളുത്തുള്ളി. വെളുത്തുള്ളിയിലടങ്ങിയിരിക്കുന്ന ആന്റി ഇൻഫ്ലമേറ്ററി ഘടകങ്ങൾ അലർജി സംബന്ധമായ ബുദ്ധിമുട്ടുകളിൽ നിന്ന് ചർമത്തെ സംരക്ഷിക്കും. അപ്പോൾ ഇനി ആരോഗ്യ സംബന്ധമായ കാര്യങ്ങൾക്കു മാത്രമല്ല ചർമ്മ സംരക്ഷണത്തിനും വെളുത്തുള്ളി ഉപയോഗിച്ചു തുടങ്ങാം.
