ദുബായ്: ഐപിഎല്ലില് ഇന്ന് ചെന്നൈ സൂപ്പര് കിംഗ്സിന് നിര്ണായക ദിനം. സണ്റൈസേഴ്സ് ഹൈദരാബാദുമായാണ് ചെന്നൈയുടെ പോരാട്ടം. ദുബായ് അന്താരാഷ്ട്ര സ്റ്റേഡിയത്തില് ഇന്ത്യന് സമയം രാത്രി 7.30നാണ് മത്സരം നടക്കുക.
മഹേന്ദ്ര സിംഗ് ധോണിയുടെ കീഴില് സമീപ കാലത്ത് ചെന്നൈയുടെ ഏറ്റവും മോശം സീസണുകളില് ഒന്നാണിതെന്ന വിമര്ശനം ഇതിനോടകം തന്നെ ഉയര്ന്നു കഴിഞ്ഞു. നിലവില് 7 മത്സരങ്ങളില് 2 ജയവും 5 തോല്വിയുമായി ചെന്നൈ 7-ാം സ്ഥാനത്താണ്. എല്ലാ ടീമുകളും ഏഴ് മത്സരങ്ങള് വീതം പൂര്ത്തിയാക്കിയതോടെ അവശേഷിക്കുന്ന മത്സരങ്ങള് ചെന്നൈയ്ക്ക് ഏറെ നിര്ണായകമാണ്.
ഓപ്പണിര്മാരായ ഫാഫ് ഡുപ്ലസിയും ഷെയ്ന് വാട്സണും പുറത്തായാല് ഇന്നിംഗ്സ് മുന്നോട്ട് കൊണ്ടുപോകാന് കഴിവുള്ള ഒരു മധ്യനിര താരത്തിന്റെ അഭാവമാണ് ടീമിന് തലവേദനയാകുന്നത്. നായകന് മഹേന്ദ്ര സിംഗ് ധോണി പഴയ പ്രതാപം വീണ്ടെടുത്തിട്ടുമില്ല. അമ്പാട്ടി റായിഡുവും ഡ്വെയ്ന് ബ്രാവോയും ഇനിയും സ്ഥിരത കൈവരിച്ചിട്ടില്ല.
മറുഭാഗത്ത് സണ്റൈസേഴ്സ് ക്യാമ്പ് ആത്മവിശ്വാസത്തിലാണ്. മോശം തുടക്കമായിരുന്നെങ്കിലും നായകന് ഡേവിഡ് വാര്ണറും ജോണി ബെയര് സ്റ്റോയും താളം കണ്ടെത്തിക്കഴിഞ്ഞു. മനീഷ് പാണ്ഡെയും കെയ്ന് വില്യംസണും ഭേദപ്പെട്ട പ്രകടനമാണ് കാഴ്ചവെക്കുന്നത്. റാഷിദ് ഖാന് ബൗളിംഗ് നിരയ്ക്കും കരുത്ത് പകരുന്നു. നിലവില് 7 കളികളില് 3 ജയവും 4 തോല്വികളുമായി അഞ്ചാം സ്ഥാനത്താണ് ഹൈദരാബാദ്.
