കൊച്ചി: മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കർ ഇന്ന് എൻഫോഴ്സ്മെന്റ് ഡയറക്ടറേറ്റിന് മുന്നിൽ ഹാജരാകില്ല. മുൻകൂർ ജാമ്യാപേക്ഷ നൽകിയ സാഹചര്യത്തിൽ ചോദ്യം ചെയ്യലിന് ഹാജരാകാൻ ശിവശങ്കർ കൂടുതൽ സമയം ചോദിച്ചേക്കുമെന്നാണ് റിപ്പോർട്ട്.
ഇന്ന് രാവിലെ 11 മണിയ്‌ക്ക് അടിയന്തരമായി ചോദ്യം ചെയ്യലിന് ഹാജരാകാൻ എൻഫോഴ്സ്മെന്റ് ശിവശങ്കറിനോട് ആവശ്യപ്പെട്ടിരുന്നു. അടിയന്തരമായി ഹാജരാകാൻ ആവശ്യപ്പെട്ട സാഹചര്യത്തിൽ അറസ്റ്റിന് സാധ്യതയുണ്ടെന്ന നിയമോപദേശം ലഭിച്ചതിനെ തുടർന്നാണ് ശിവശങ്കർ കോടതിയെ സമീപിച്ചതെന്നാണ് വിവരം.
കഴിഞ്ഞ ദിവസം ശിവശങ്കർ ഹൈക്കോടതി അഭിഭാഷകനെ സന്ദർശിച്ച് നിയമോപദേശം തേടിയിരുന്നു. സ്വർണ്ണക്കടത്ത് കേസുമായി ബന്ധപ്പെട്ട് അറസ്റ്റ് തടയുന്നത് അടക്കമുള്ള കാര്യങ്ങളിൽ നിയമോപദേശം തേടുന്നതിനാണ് അഭിഭാഷകനെ കാണാൻ ശിവശങ്കർ എത്തിയത്.
