ദുബായ്: ഡല്‍ഹി ക്യാപിറ്റല്‍സിനെതിരെ രാജസ്ഥാന് റോയല്‍സിന് 162 റണ്‍സ് വിജയലക്ഷ്യം. ടോസ് നേടി ആദ്യം ബാറ്റ് ചെയ്ത ഡല്‍ഹി നിശ്ചിത 20 ഓവറില്‍ 7 വിക്കറ്റ് നഷ്ടത്തില്‍ 161 റണ്‍സെടുത്തു. ഡല്‍ഹിക്കു വേണ്ടി ശിഖര്‍ ധവാനും നായകന്‍ ശ്രേയസ് അയ്യരും അര്‍ദ്ധ സെഞ്ച്വറി നേടി.
നേരിട്ട ആദ്യ പന്തില്‍ തന്നെ ഓപ്പണറായ പൃഥ്വി ഷാ പുറത്തായി. മൂന്നാമനായതെത്തിയ അജിങ്ക്യ രഹാനെ (2) വന്നപോലെ മടങ്ങിയപ്പോള്‍ ശിഖര്‍ ധവാന് ഒരറ്റത്ത് ഉറച്ചുനിന്നു. 33 പന്തുകള്‍ നേരിട്ട ധവാന് 57 റണ്‍സെടുത്ത ശേഷമാണ് മടങ്ങിയത്. ശ്രേയസ് അയ്യര്‍(53) ധവാന് ഉറച്ച പിന്തുണ നല്‍കി.
രാജസ്ഥാന് വേണ്ടി ജോഫ്ര ആര്‍ച്ചര്‍ 4 ഓവറില്‍ 19 റണ്‍സ് വഴങ്ങി 3 വിക്കറ്റ് വീഴ്‌ത്തി. ജയദേവ് ഉനദ്കട്ട് 2 വിക്കറ്റും കാര്‍ത്തിക് ത്യാഗി, ശ്രേയസ് ഗോപാല്‍ എന്നിവര്‍ ഓരോ വിക്കറ്റ് വീതവും സ്വന്തമാക്കി.
മറുപടി ബാറ്റിംഗില്‍ ഓപ്പണര്‍മാരായ ബെന്‍ സ്റ്റോക്സും ജോസ് ബട്‌ലറും(22) രാജസ്ഥാന് മികച്ച തുടക്കമാണ് നല്‍കിയത്. 3 ഓവറില്‍ 37 റണ്‍സ് കൂട്ടിച്ചേര്‍ത്താണ് സഖ്യം വേര്‍പിരിഞ്ഞത്. സ്റ്റീവ് സ്മിത്ത്(1) നിലയുറപ്പിക്കും മുന്‍പേ മടങ്ങി. ഒടുവില്‍ വിവരം ലഭിക്കുമ്പോള്‍ 26 റണ്‍സുമായി സ്റ്റോക്സും 9 റണ്‍സുമായി സഞ്ജു സാംസണുമാണ് ക്രീസില്‍.
