ദുബായ്: ഡല്‍ഹി ക്യാപിറ്റല്‍സിനെതിരെ കിംഗ്‌സ് ഇലവന്‍ പഞ്ചാബിന് 165 റണ്‍സ് വിജയലക്ഷ്യം. ടോസ് നേടി ആദ്യം ബാറ്റ് ചെയ്ത ഡല്‍ഹി നിശ്ചിത 20 ഓവറില്‍ 5 വിക്കറ്റ് നഷ്ടത്തില്‍ 164 റണ്‍സെടുത്തു. ഓപ്പണര്‍ ശിഖര്‍ ധവാന്റെ സെഞ്ച്വറിയുടെ ബലത്തിലാണ് ഡല്‍ഹി മികച്ച സ്‌കോര്‍ സ്വന്തമാക്കിയത്. തുടര്‍ച്ചയായ രണ്ടാം മത്സരത്തിലാണ് ധവാന്‍ സെഞ്ച്വറി നേടുന്നത്.
തുടക്കം മുതല്‍ കഴിഞ്ഞ മത്സരത്തിലെ ഫോം തുടരുന്നതിന്റെ സൂചനകള്‍ ധവാന്‍ നല്‍കിയിരുന്നു. എന്നാല്‍ മറുഭാഗത്ത് പൃഥ്വി ഷാ(7) കാര്യമായ സംഭാവന നല്‍കാതെ മടങ്ങി. മൂന്നാമനായെത്തിയ നായകന്‍ ശ്രേയസ് അയ്യര്‍ക്കും(14) നിലയുറപ്പിക്കാനായില്ല. പരിക്ക് ഭേദമായി തിരിച്ചെത്തിയ ഋഷഭ് പന്ത് 14 റണ്‍സുമായി മടങ്ങിയപ്പോഴും ധവാന്‍ ഒരറ്റത്ത് ഉറച്ചുനിന്നു. 57 പന്തില്‍ 12 ബൗണ്ടറികളുടെയും മൂന്ന് സിക്‌സറുകളുടെയും അകമ്പടിയോടെയാണ് ധവാന്‍ സെഞ്ച്വറി(106*) തികച്ചത്.
പഞ്ചാബിനു വേണ്ടി മുഹമ്മദ് ഷമി 4 ഓവറില്‍ 28 റണ്‍സ് വഴങ്ങി 2 വിക്കറ്റ് വീഴ്‌ത്തി. ഗ്ലെന്‍ മാക്‌സ്‌വെല്‍, ജയിംസ് നിഷാം, മുരുഗന്‍ അശ്വിന്‍ എന്നിവര്‍ ഓരോ വിക്കറ്റ് വീതം സ്വന്തമാക്കി.
