ദുബായ്: ആവേശകരമായ മത്സരത്തിൽ ഡല്‍ഹി ക്യാപിറ്റല്‍സിനെതിരെ കിംഗ്‌സ് ഇലവന്‍ പഞ്ചാബിന് ജയം. 165 റണ്‍സ് വിജയലക്ഷ്യവുമായി ബാറ്റിംഗ് ആരംഭിച്ച പഞ്ചാബ് 19 ഓവറില്‍ 5 വിക്കറ്റ് നഷ്ടത്തില്‍ വിജയലക്ഷ്യം മറികടന്നു. നിക്കോളാസ് പൂരന്റെ അര്‍ദ്ധ സെഞ്ച്വറിയാണ് പഞ്ചാബിന്റെ വിജയത്തില്‍ നിര്‍ണായകമായത്.
പതിവിനു വിപരീതമായി ഓപ്പണര്‍മാരായ മായങ്ക് അഗര്‍വാളും(5) കെ.എല്‍ രാഹുലും(15) തുടക്കത്തില്‍ തന്നെ പുറത്തായി. മൂന്നാമനായി ക്രീസിലെത്തിയ ക്രിസ് ഗെയ്ല്‍ 13 പന്തില്‍ 29 റണ്‍സ് നേടി. തുഷാര്‍ ദേശ്പാണ്ഡെയുടെ ഓവറില്‍ മൂന്ന് ബൗണ്ടറികളും രണ്ട് സിക്‌സറുകളും ഉള്‍പ്പെടെ 26 റണ്‍സാണ് ഗെയ്ല്‍ അടിച്ചു കൂട്ടിയത്. മികച്ച ഫോമില്‍ ബാറ്റ് ചെയ്ത പൂരന് 28 പന്തില്‍ 53 റണ്‍സ് നേടി. 24 പന്തില്‍ 32 റണ്‍സ് നേടിയ ഗ്ലെന്‍ മാക്‌സ്‌വെല്‍ പൂരന് മികച്ച പിന്തുണയാണ് നല്‍കിയത്.
പഞ്ചാബിന് വേണ്ടി കാഗിസോ റബാഡ 4 ഓവറില്‍ 27 റണ്‍സ് വഴങ്ങി 2 വിക്കറ്റ് വീഴ്‌ത്തി. അക്‌സര്‍ പട്ടേല്‍ രവിചന്ദ്രന്‍ അശ്വിന്‍ എന്നിവര്‍ ഓരോ വിക്കറ്റ് വീതം സ്വന്തമാക്കി. ജയത്തോടെ കിംഗ്‌സ് ഇലവന്‍ പഞ്ചാബ് പോയിന്റ് പട്ടികയില്‍ അഞ്ചാം സ്ഥാനത്തെത്തി. 10 കളികളില്‍ 7 വിജയവുമായി ഡല്‍ഹി ക്യാപിറ്റല്‍സ് ഒന്നാം സ്ഥാനത്ത് തുടരുകയാണ്.
