ദുബായ്: നിര്ണായക മത്സരത്തില് രാജസ്ഥാന് റോയല്സിനെതിരെ സണ്റൈസേഴ്സ് ഹൈദരാബാദിന് 8 വിക്കറ്റ് ജയം. 155 റണ്സ് വിജയലക്ഷ്യവുമായി ബാറ്റിംഗിനിറങ്ങിയ ഹൈദരാബാദ് 11 പന്ത് ബാക്കി നിര്ത്തി വിജയലക്ഷ്യം മറികടന്നു.
ഹൈദരാബാദിന് നായകന് ഡേവിഡ് വാര്ണറിന്റെയും(4) ജോണി ബെയര്സ്റ്റോയുടെയും(10) വിക്കറ്റുകള് തുടക്കത്തില് തന്നെ നഷ്ടമായിരുന്നു. ജോഫ്ര ആര്ച്ചറാണ് രണ്ട് വിക്കറ്റുകളും വീഴ്ത്തിയത്. ഇതിനു പിന്നാലെ ക്രീസില് ഒന്നിച്ച മനീഷ് പാണ്ഡെയും വിജയ് ശങ്കറും ചേര്ന്നാണ് ടീമിനെ വിജയത്തിലെത്തിച്ചത്. ഇരുവരും ചേര്ന്ന് 140 റണ്സാണ് കൂട്ടിച്ചേര്ത്തത്. മികച്ച ഫോമില് ബാറ്റ് വീശിയ പാണ്ഡെ 47 പന്തില് 4 ബൗണ്ടറികളുടെയും 8 സിക്സറുകളുടെയും അകമ്പടിയോടെ 83 റണ്സ് നേടി. വിജയ് ശങ്കര് 51 പന്തില് 52 റണ്സ് നേടി പാണ്ഡെയ്ക്ക് ഉറച്ച പിന്തുണ നല്കിയതോടെ ഹൈദരാബാദ് അനായാസ ജയം സ്വന്തമാക്കുകയായിരുന്നു.
ജയിച്ചെങ്കിലും പോയിന്റ് പട്ടികയില് ഹൈദരാബാദ് അഞ്ചാം സ്ഥാനത്താണ്. 11 കളികളില് നാല് ജയവുമായി രാജസ്ഥാന് ഏഴാം സ്ഥാനത്താണ്.
Comments