ഷാര്‍ജ: ഐപിഎല്ലില്‍ ഇന്ന് ആവേശപ്പോരാട്ടം. നിലവിലെ ചാമ്പ്യന്‍മാരായ മുംബൈ ഇന്ത്യന്‍സ് ചെന്നൈ സൂപ്പര്‍ കിംഗ്‌സിനെ നേരിടും. സീസണിലെ ആദ്യ മത്സരത്തിനേറ്റ തോല്‍വിയ്‌ക്ക് പകരം വീട്ടാന്‍ മുംബൈ കച്ചകെട്ടുമ്പോള്‍ പ്ലേ ഓഫ് സാധ്യത നിലനിര്‍ത്താനാണ് ചെന്നൈ ഇറങ്ങുന്നത്. ഷാര്‍ജയില്‍ ഇന്ത്യന്‍ സമയം രാത്രി 7.30നാണ് മത്സരം.
ആദ്യ 10 മത്സരങ്ങളില്‍ 7 എണ്ണത്തിലും പരാജയപ്പെട്ട ചെന്നൈയ്‌ക്ക് ഇനി വെറും നാല് മത്സരങ്ങള്‍ മാത്രമാണ് അവശേഷിക്കുന്നത്. നാലിലും ജയിച്ചാലും പ്ലേ ഓഫില്‍ കടക്കുക ചെന്നൈയ്‌ക്ക് വലിയ കടമ്പയാണ്. പ്രതീക്ഷ നിലനിര്‍ത്താന്‍ ഇന്നത്തെ മത്സരം ചെന്നൈയ്‌ക്ക് ജയിച്ചേ തീരൂ. വയസന്‍ പടയെന്ന ചീത്തപ്പേര് മാറ്റാനായി ടീമില്‍ വലിയ മാറ്റങ്ങള്‍ ഉണ്ടായേക്കുമെന്നാണ് വിവരം. നായകന്‍ എം.എസ് ധോണിയും പരിശീലകന്‍ സ്റ്റീഫന്‍ ഫ്‌ലെമിംഗും ഇതിനോടകം തന്നെ ഏറെ വിമര്‍ശനങ്ങള്‍ ഏറ്റുവാങ്ങിക്കഴിഞ്ഞു.
മറുഭാഗത്ത് മുംബൈ ഇന്ത്യന്‍സ് പ്ലേ ഓഫ് ഏതാണ്ട് ഉറപ്പിച്ചു കഴിഞ്ഞു. 9 കളികളില്‍ 6 എണ്ണത്തിലും ജയിച്ച മുംബൈ മൂന്നാം സ്ഥാനത്താണ്. മികച്ച റണ്‍റേറ്റുള്ളതിനാല്‍ ഇന്നത്തെ മത്സരം വിജയിച്ചാല്‍ മുംബൈയ്‌ക്ക് ഒന്നാമതെത്താം. നായകന്‍ രോഹിത് ശര്‍മ്മയും ക്വിന്റണ്‍ ഡീകോക്കും നല്‍കുന്ന തുടക്കവും അവസാന ഓവറുകളിലെ പൊള്ളാര്‍ഡിന്റെ വെടിക്കെട്ടുമാണ് മുംബൈയുടെ കരുത്ത്. ചെന്നൈയ്‌ക്കെതിരെ ആദ്യ മത്സരത്തിലേറ്റ പരാജയത്തിന് മുംബൈ അതേനാണയത്തില്‍ തിരിച്ചടി നല്‍കുമെന്ന പ്രതീക്ഷയിലാണ് ആരാധകര്‍.
