ലണ്ടന്‍: ചാമ്പ്യന്‍സ് ലീഗില്‍ മാഞ്ചസ്റ്റര്‍യുണൈറ്റഡ് ഗോളടിച്ച് മുന്നേറി. ലീപ്‌സിഗിനെ എതിരില്ലാത്ത അഞ്ചുഗോളുകള്‍ക്ക് തകര്‍ത്താണ് ഓള്‍ഡ് ട്രാഫോഡില്‍ ഇംഗ്ലീഷ് നിര നിറഞ്ഞാടിയത്. മാര്‍ക്കസ് റാഷ്‌ഫോഡാണ് കളിയിലെ താരമായി മാറിയത്. ഹാട്രിക്കുമായി ടീമിന്റെ അഞ്ചുഗോള്‍ ജയത്തില്‍ മാര്‍ക്കസ് നിറഞ്ഞുനിന്നു. കളിയുടെ 21-ാം മിനിറ്റില്‍ ഗ്രീന്‍വുഡാണ് ചുവപ്പന്‍ പടയ്‌ക്ക് ആദ്യഗോള്‍ സമ്മാനിച്ചത്. തുടര്‍ന്ന് പ്രതിരോധവും ആക്രമണവും പരസ്പ്പരം ശക്തമാക്കിയതോടെ ആദ്യ പകുതിയില്‍ ഗോളുകളൊന്നും വീണില്ല.
രണ്ടാം പകുതിയില്‍ അവസാന 20 മിനിറ്റുകളില്‍ നാലു ഗോളുകള്‍ യുണൈറ്റഡ് അടിച്ചുകൂട്ടി. റാഷ്‌ഫോഡ് 74-ാം മിനിറ്റിലും 78-ാം മിനിറ്റിലും തുടര്‍ച്ചയായി ഗോളുകള്‍നേടി. 87-ാം മിനിറ്റിലെ പെനാല്‍റ്റി ഗോളാക്കി ആന്റണി മാര്‍ഷ്യല്‍ ടീമിന് 4-0ന്റെ ലീഡും നല്‍കി. കളിയുടെ അവസാന നിമിഷത്തെ അധിക സമയത്ത് തന്റെ ഹാട്രിക് തികച്ച് റാഷ്‌ഫോഡ് മാഞ്ചസ്റ്റര്‍ യുണൈറ്റഡിന് 5-0ന്റെ ഗംഭീരജയവും സമ്മാനിച്ചു.
