ഷാര്ജ: ഐ.പി.എല് വനിതാ ട്വന്റി 20 മത്സരത്തിൽ വെലോസിറ്റിക്കെതിരെ ട്രെയിൽബ്ലേസേഴ്സിന് 48 റൺസ് വിജയലക്ഷ്യം. ടോസ് നേടി ബാറ്റിങ്ങിന് ഇറങ്ങിയ വെലോസിറ്റി 15.1 ഓവറില് 47 റണ്സിന് പുറത്തായി. 13 റണ്സ് നേടിയ ഷെഫാലി വര്മയാണ് ടീമിന്റെ ടോപ് സ്കോറർ.
ട്രെയിൽബ്ലേസേഴ്സിന്റെ സോഫി എക്സ്ലസ്റ്റൺ നാല് വിക്കറ്റാണ് വീഴ്ത്തിയത്. രണ്ടാം ഓവര് ഗോസ്വാമി വ്യാറ്റിനെ മടക്കി. തൊട്ടടുത്ത ഓവറില് സുഷമയെ എക്ലെസ്റ്റോണ് വിക്കറ്റ് വീഴ്ത്തി. തുടര്ന്ന് വന്നവര്ക്ക് വിക്കറ്റ് നഷ്ടമായത്തോടെ വെലോസിറ്റിയുടെ സ്കോര് 47ല് ഒതുങ്ങി.
ഇന്നലെ നടന്ന മത്സരത്തില് ഹര്മന്പ്രീത് കൗര് നയിക്കുന്ന സൂപ്പര്നോവാസിനെ തോല്പ്പിച്ച ടീമാണ് വെലോസിറ്റി. ബാറ്റിങ്ങിനിറങ്ങിയ സൂപ്പര്നോവാസ് നിശ്ചിത ഓവറില് എട്ട് വിക്കറ്റ് നഷ്ടത്തില് 126 റണ്സെടുത്തിരുന്നു. മറുപടി ബാറ്റിങ്ങില് വെലോസിറ്റി 19.5 ഓവറില് അഞ്ച് വിക്കറ്റ് മാത്രം നഷ്ടത്തില് ലക്ഷ്യം മറികടന്നു.
ടൂര്ണമെന്റില് ആകെ മൂന്ന് ടീമുകളാണ് ഉള്ളത്. ഹര്മന്പ്രീത് നയിക്കുന്ന സൂപ്പര്നോവാസ്, സ്മൃതി മന്ദാന നയിക്കുന്ന ട്രെയല്ബ്ലെയ്സേഴ്സ്, മിതാലി രാജ് നയിക്കുന്ന വെലോസിറ്റി എന്നീ ടീമുകളാണ് ഏറ്റുമുട്ടുക. കളിയിൽ കൂടുതൽ പോയിന്റ് നേടുന്ന ടീമുകളാണ് ഫൈനലിൽ എത്തുക. ഫൈനല് നവംബര് 9 നാണ് നടക്കുന്നത്.
Comments