ദുബായ് : ബൂമ്രയുടെ തീ തുപ്പുന്ന പന്തുകൾക്ക് മുൻപിൽ മുട്ടിടിച്ച് ഡൽഹി കൂടാരം കയറിയപ്പോൾ താരം സ്വന്തമാക്കിയത് ഒരു പിടി നേട്ടങ്ങളാണ്. ഈ സീസണിലെ പർപ്പിൾ ക്യാപ്പ് ഡൽഹിയുടെ റബാദയുടെ കയ്യിൽ നിന്നും പിടിച്ചുവാങ്ങിയ ബൂമ്ര ഭുവനേശ്വർ കുമാറിൽ നിന്ന് മറ്റൊരു നേട്ടം കൂടി തട്ടിയെടുത്തു. ഐപിഎല്ലിലെ ഒരു സീസണിൽ ഏറ്റവുമധികം വിക്കറ്റുകൾ നേടുന്ന ഇന്ത്യൻ താരമെന്ന നേട്ടമാണ് ബൂമ്ര സ്വന്തമാക്കിയിരിക്കുന്നത്.
നാലോവറില്‍ ഒരു മെയ്ഡനുള്‍പ്പെടെ 14 റണ്‍സ് മാത്രം വിട്ടുകൊടുത്ത് നാലു വിക്കറ്റുകൾ സ്വന്തമാക്കിയ ബൂമ്രയാണ് ആദ്യ ക്വാളിഫയറിൽ മുംബൈയ്‌ക്ക് അനായാസ ജയം സമ്മാനിച്ചത്. ഡല്‍ഹി ഓപ്പണര്‍ ശിഖര്‍ ധവാൻ, നായകൻ ശ്രേയസ് അയ്യര്‍, മാര്‍ക്കസ് സ്റ്റോയ്‌നിസ്, ഡാനിയേല്‍ സാംസ് എന്നിവരായിരുന്നു ബൂമ്രയുടെ ഇരകള്‍. ഇതിൽ ശിഖർ ധവാൻ കാണുന്നതിന് മുൻപ് തന്നെ പന്ത് സ്റ്റംപും തെറുപ്പിച്ച് കടന്നുപോയിരുന്നു. അർദ്ധ സെഞ്ച്വറിയുമായി ഒരു വിധത്തിൽ ഡൽഹിയെ കരകയറ്റിക്കൊണ്ടുവന്ന സ്റ്റോയിനിസിനെ ബൂമ്ര കൂടാരം കയറ്റി. ഇതോടെ ഡൽഹി തോൽവിയും ഉറപ്പിച്ചു.
നാല് വിക്കറ്റുകൾ നേടിയതോടെ 27 വിക്കറ്റുമായി ഈ സീസണിലെ വിക്കറ്റ് വേട്ടക്കാരുടെ പട്ടികയിൽ ബൂമ്ര ഒന്നാമത്തെത്തി. 25 വിക്കറ്റുകളുള്ള റബാദയെയാണ് മറികടന്നത്. 14 ഇന്നിംഗ്സുകളിൽ 56 ഓവറുകളാണ് ഇതുവരെ ബൂമ്ര എറിഞ്ഞത്. ഇതിൽ നിന്ന് 376 റണ്‍സ് വഴങ്ങിയാണ് 27 വിക്കറ്റുകള്‍ നേടിയത്. ഡല്‍ഹിക്കെതിരെ നാല് ഓവറിൽ 14 റണ്‍സ് വഴങ്ങി നാലു വിക്കറ്റെടുത്തതാണ് മികച്ച പ്രകടനം. ഈ സീസണിൽ മികച്ച എക്കോണമി റേറ്റ് ഉള്ള ബൗളറും ബൂമ്ര തന്നെയാണ്. 6.17 ആണ് ഇക്കോണമി റേറ്റ്.
27 വിക്കറ്റുകൾ നേടിയതോടെ 2017ൽ ഭുവനേശ്വർ കുമാർ കുറിച്ച മറ്റൊരു നേട്ടവും ബൂമ്ര മറികടന്നു. ഒരു സീസണിൽ ഏറ്റവുമധികം വിക്കറ്റുകൾ നേടുന്ന ഇന്ത്യൻ താരമെന്ന നേട്ടമാണ് ബൂമ്ര മറികടന്നത്. 26 വിക്കറ്റുകളാണ് ഭുവനേശ്വറിന്റെ നേട്ടം. 24 വിക്കറ്റുകൾ വീതം നേടി. ഹർഭജൻ സിംഗും ജയദേവ് ഉനദ്കട്ടും പട്ടികയിൽ മൂന്നും നാലും സ്ഥാനത്തുണ്ട്. ഹർഭജൻ 2013 സീസണിലും ഉനദ്കട്ട് 2017 സീസണിലുമാണ് ഇത്രയും വിക്കറ്റുകൾ നേടിയത്.
