അബുദാബി: ഇന്ത്യന്‍ പ്രീമിയര്‍ ലീഗിന്റെ കലാശപ്പോരാട്ടത്തെ ലോകകപ്പ് ഫൈനലിനോട് താരതമ്യം ചെയ്ത് കീറന്‍ പൊള്ളാഡ്. ലോകകപ്പ് കലാശപ്പോരാട്ടത്തില്‍ കളിക്കുക എന്നാല്‍ ഏതൊരു താരത്തിന്റേയും ആഗ്രഹമാണ്. എന്നാല്‍ അതേ ആവേശം തന്നെയാണ് ഐ.പി.എല്‍ ഫൈനലും നല്‍കുന്നതെന്ന് മുംബൈ ഇന്ത്യന്‍സ് താരമായ വിന്‍ഡീസ് ഓള്‍റൗണ്ടര്‍ പറഞ്ഞു. ഇന്ന് നടക്കാനിരിക്കുന്ന മുംബൈ ഇന്ത്യന്‍സും ഡല്‍ഹി ക്യാപ്പിറ്റല്‍സും തമ്മിലുള്ള കലാശപ്പോരാട്ടത്തിന് മുന്നോടിയായാണ് പൊള്ളാഡ് തന്റെ ആവേശം പങ്കുവെച്ചത്.
ഒരു കലാശപ്പോരാട്ടമെന്നാല്‍ അത് സമ്മര്‍ദ്ദം നിറഞ്ഞതായിരിക്കും. എല്ലാവരും ആ സമ്മര്‍ദ്ദത്തിന്റെ ഭാഗമായി മാറും. ഒരു ചെറിയ പിഴവുപോലും ഉണ്ടാകാതിരിക്കാന്‍ എല്ലാവരും ശ്രമിക്കും. എന്നാല്‍ ആത്യന്തികമായി ഫൈനലും ഒരു സാധാരണ ക്രിക്കറ്റ് മത്സരമാണെന്ന ബോധ്യമാണ് ഉണ്ടാകേണ്ടതെന്നും പൊള്ളാഡ് പറഞ്ഞു. കാണികളില്ലെങ്കിലും ഫൈനല്‍ എന്നും ഫൈനല്‍ തന്നെയാണെന്നും വിന്‍ഡീസ് താരം പറഞ്ഞു.
