പ്രതലത്തിന്റെ നിറത്തിനനുസരിച്ച് നിറം മാറുന്ന ഓന്ത്; വൈറലായി വീഡിയോ

നിൽക്കുന്ന പ്രതലത്തിന്റെ വർണ്ണത്തിന് അനുസരിച്ച് നിറം മാറാൻ കഴിവുള്ള ജീവിയാണ് ഓന്ത്. ഓന്ത് നിറം മാറുമെന്ന് പറഞ്ഞു കേട്ടിരിക്കുമെങ്കിലും അത് കാണാനുള്ള ഭാഗ്യം എല്ലാവർക്കും ലഭിച്ചിട്ടുണ്ടാവില്ല. അത്തരക്കാർക്കായി ഒരു വീഡിയോ പങ്കുവെച്ചിരിക്കുകയാണ് ഐഎഫ്എസ് ഉദ്യോഗസ്ഥനായ സുശാന്ത നന്ദ.

36 സെക്കന്റ് ദൈർഘ്യമുള്ള വീഡിയോയാണ് പങ്കുവെച്ചിരിക്കുന്നത്. സ്‌ട്രോയിലൂടെ പിടിച്ചു കയറുന്ന ഓന്താണ് വീഡിയോയിലുള്ളത്. പല നിറത്തിലുള്ള സ്‌ട്രോകൾ കൂട്ടിച്ചേർത്ത് നിർമ്മിച്ച ഒരു വസ്തുവിലൂടെ പിടിച്ചു കയറുകയാണ് ഓന്ത്. ഓരോ നിറത്തിലുള്ള സ്‌ട്രോയിൽ സ്പർശിക്കുമ്പോഴും ആ സ്‌ട്രോയുടെ നിറത്തിലേക്ക് മാറുന്ന ഓന്തിനെ വീഡിയോ ദൃശ്യങ്ങളിൽ കാണാം.

ആദ്യം പച്ച നിറത്തിലുള്ള ഓന്ത് മഞ്ഞ സ്‌ട്രോയിൽ സ്പർശിക്കുമ്പാൾ മഞ്ഞ കളറാകുന്നു. പിന്നീട് ഓറഞ്ച് കളറിലുള്ള സ്‌ട്രോയിൽ പിടിക്കുമ്പോൾ ഓന്ത് ഓറഞ്ച് വർണത്തിലേക്ക് മാറുന്നു. മജന്ത നിറത്തിലെ സ്‌ട്രോയിൽ സ്പർശിക്കുമ്പോൾ ഓന്തിന്റെ ശരീരം മജന്ത നിറത്തിലാകുന്നതും വീഡിയോയിൽ വ്യക്തമാണ്. നിരവധി പേർ ഇതിനോടകം വീഡിയോ കണ്ടുകഴിഞ്ഞു.

ഓന്തിന്റെ ത്വക്കിൽ ക്രോമോഫോറുകൾ എന്ന ഇനം പ്രത്യേക സെല്ലുകളുണ്ട്. ഈ സെല്ലുകൾക്കുള്ളിൽ പിഗ്‌മെന്റുകളും. തൊലിയുടെ പുറം പാളി സുതാര്യമാണ് അതിന് കീഴിൽ മൂന്ന് പാളികൾ ഉണ്ട്. പുറം പാളിയിൽ മഞ്ഞയും ചുവപ്പും പിഗ്മെന്റുകളുള്ള കോശങ്ങളാണ്. മദ്ധ്യത്തിലെ പാളിയിൽ നീല നിറമോ വെള്ള നിറമോ ആയി തോന്നിക്കുന്ന പിഗ്മെന്റുള്ള കോശങ്ങളാണ് ഉള്ളത്. ഏറ്റവും ഉള്ളിലുള്ള പാളിയിൽ കറുത്ത പിഗ്മെന്റുകളാണുള്ളത്. ഈ പാളിയിലെ കോശങ്ങളാണ് പ്രകാശം പ്രതിഫലിപ്പിക്കുന്നതിനെ നിയന്ത്രിക്കുന്നത്.

പിഗ്മെന്റ് തരികളുടെ വിതരണമാണ് ഓരോ നിറത്തിന്റെയും അളവ് നിയന്ത്രിക്കുന്നത്. പിഗ്മെന്റ് തുല്യമായി വിതരണം ചെയ്തിരിക്കുന്ന സമയത്ത് കോശം ഏറ്റവും കടുത്ത നിറത്തിൽ കാണപ്പെടും. പിഗ്മെന്റ് കോശത്തിന്റെ മദ്ധ്യത്തായിരിക്കുമ്പോൾ കോശം സുതാര്യമായിരിക്കും. മസ്തിഷ്‌കത്തിൽ നിന്നുള്ള സന്ദേശത്തിനനുസരിച്ചാണ് ക്രോമോഫോറുകൾ നിറം മാറുന്നത്. താപനിലയുടെ വ്യത്യാസത്തിന് അനുസരിച്ചും പരിസ്ഥിതിയിലെ മാറ്റങ്ങൾക്കനുസരിച്ചുമാണ് ഓന്ത് നിറം മാറുന്നത്.

Praying for ur Colourful Diwali🙏

The pigments of Chameleon are locked away in tiny sacs within the cells. When a chameleon experiences changes in body temperature, environment or mood, its nervous system tells specific chromatophores to expand or contract,changing cell colours. pic.twitter.com/kRvKTnn6Mw

— Susanta Nanda (@susantananda3) November 14, 2020