മുംബൈ: ഐ.പി.എല്ലിലെ എക്കാലത്തേയും ആവേശമായ മുന് ഇന്ത്യന് താരം മഹേന്ദ്ര സിംഗ് ധോണിയെ ലേലത്തില് പിടിക്കാന് മറ്റുള്ളവര്ക്കും അവസരം നല്കണമെന്ന് ഫ്രാഞ്ചൈസികള്. വരുന്ന ഏപ്രിലില് ഇന്ത്യയില് നടക്കാനിരിക്കുന്ന ഐ.പി.എല് 14-ാം സീസണിലാണ് ധോണി എന്ന ഇതിഹാസതാരം വീണ്ടും ചര്ച്ചയാകുന്നത്.
ദുബായില് നടന്ന ഐ.പി.എല്ലില് ചെന്നൈ സൂപ്പര് കിംഗ്സിനെ നയിച്ചെങ്കിലും പോരാട്ട വീര്യത്തിന്റെ അടുത്തുപോലും എത്താതെ നിരാശനായിട്ടാണ് ധോണി കാണപ്പെട്ടത്. ടീം പ്ലേ ഓഫ് പോലും കാണാതെ പുറത്താവുകയും ചെയ്തു. ഇതിനിടെ അടുത്ത സീസണിലും ധോണി ചെന്നൈയില്ത്തന്നെ തുടരുമെന്നാണ് സൂപ്പര് കിംഗ്സ് ഉടമസ്ഥരുടെ തീരുമാനം. നായക സ്ഥാനത്തെ സമ്മര്ദ്ദം മാറ്റാന് ഡ്യൂപ്ലെസിയെ നായകനാക്കി ധോണിയ സ്വതന്ത്രമായി കളിക്കാന് അനുവദിക്കുകയാണ് വേണ്ടതെന്നുമുള്ള ചര്ച്ചകളും സജീവമായി നടക്കുകയാണ്.
ധോണിയെ കൈമാറ്റം ചെയ്യുന്നതിലൂടെ സൂപ്പര് കിംഗ്സിന് കുറഞ്ഞത് 15 കോടി രൂപയെങ്കിലും ലാഭിക്കാം. ധോണിയുടെ സ്ഥാനത്ത് മൂന്ന് താരങ്ങളെയെങ്കിലും ചെന്നൈയ്ക്ക് ലഭിക്കുമെന്ന ആശയവുമായി മുന് താരം ആകാശ് ചോപ്രയാണ് രംഗത്തെത്തിയത്. മൂന്ന് സീസണിലേക്ക് ധോണിയെ നേടണമെങ്കില് 15 കോടി ചിലവാകും. അതേസമയം, ആ സീസണില് പൊതു ലേലത്തിന് വെച്ചാല് 5 കോടി രൂപയ്ക്ക് ധോണിയെ ചെന്നൈയ്ക്ക് വീണ്ടും വിളിച്ചെടുക്കാമെന്ന തന്ത്രമാണ് ചോപ്ര മുന്നോട്ട് വയ്ക്കുന്നത്. എന്നാല് പൊതു ലേലത്തിലേക്ക് പോയാല് ധോണിയെ നഷ്ടപ്പെടുമെന്നതാണ് ചെന്നൈ സൂപ്പര് കിംഗ്സിനെ അലട്ടുന്നത്.
