സിഡ്‌നി: ആദ്യ ഏകദിനത്തില്‍ ഇന്ത്യയ്ക്ക് മുന്നില്‍ ശക്തമായ വിജയലക്ഷ്യമുയര്‍ത്തി ഓസ്‌ട്രേലിയ. ആരോണ്‍ ഫിഞ്ചിന്റേയും സ്റ്റീവ് സ്മിത്തിന്റേയും സെഞ്ച്വറി മികവിലാണ് ഓസീസ് തകര്‍പ്പന്‍ സ്‌കോര്‍ നേടിയത്. ഓപ്പണിംഗില്‍ വാര്‍ണര്‍(69)ക്കൊപ്പം ശ്രദ്ധിച്ച് കളിച്ച ഫിഞ്ച് മുന്‍നായകന്‍ സ്റ്റീവ് സ്മിത് വന്നതോടെ ഗിയര്‍ മാറ്റി. വാര്‍ണറെ ഷമിയുടെ പന്തില്‍ രാഹുല്‍ പിടിച്ചാണ് പുറത്താക്കിയത്. ഫിഞ്ചിനെ ബുംറയുടെ പന്തില്‍ രാഹുല്‍ തന്നെ മടക്കി. 124 പന്തില്‍ 9 ബൗണ്ടറികളും 2 സിക്‌സറുമടക്കമാണ് ഫിഞ്ച് 114 റണ്‍സ് നേടിയത്.
സ്റ്റോയിന്‍സിനെ പൂജ്യത്തിന് പറഞ്ഞുവിട്ട് ചാഹല്‍ ഇന്ത്യക്ക് മൂന്നാം വിക്കറ്റ് സമ്മാനിച്ചെങ്കിലും പിന്നീട് സ്മിത്തും മാക്‌സ്‌വെല്ലും ചുവടുറപ്പിച്ചു. സ്മിത്തിനൊപ്പം 19 പന്തില്‍ 45 റണ്‍സ് അടിച്ചുകൂട്ടി മാക്‌സ്‌വെല്‍ തന്റെ ശൗര്യം പുറത്തെടുത്തതോടെ ഓസീസ് സ്‌കോര്‍ 350 കടന്ന് കുതിച്ചു. ഷമിയുടെ രണ്ടാമത്തെ ഇരയായി മാക്‌സ്‌വെല്ലിനെ രവീന്ദ്ര ജഡേജയാണ് ക്യാച്ചെടുത്ത് മടക്കിയത്. 5 ഫോറും 3 സിക്‌സറുമടക്കമാണ് മാക്‌സ്‌വെല്‍ തന്റെ അര്‍്ദ്ധസെഞ്ച്വറിക്ക് 5 റണ്‍സ് അകലെ വീണത്.
സ്മിത്തിനൊപ്പം തുടങ്ങിയെങ്കിലും ലബുഷാനയെ രണ്ട് റണ്‍സില്‍ സെയ്‌നിയുടെ പന്തില്‍ ധവാന്‍ പിടിച്ചു. അവസാന ഓവഫില്‍ ഷമിയുടെ മൂന്നാമത്തെ ഇരയായിട്ടാണ് സ്മിത്ത് വീണത്. അവസാന ഓവര്‍ വരെ നിന്ന സ്മിത്ത് 66 പന്തില്‍ 11 ബൗണ്ടിറകളും 4 സിക്‌സറും പറത്തി അതിവേഗമാണ് 105 റണ്‍സ് നേടി കളിയിലെ രണ്ടാം സെഞ്ച്വറി താരമായത്. കളി അവസാനിപ്പിക്കുമ്പോള്‍ 17 റണ്‍സുമായി ക്യാരിയും ഒരു റണ്‍സുമായി കുമ്മിന്‍സും ക്രീസിലുണ്ടായിരുന്നു.
ഇന്ത്യന്‍ ബൗളര്‍മാര്‍ക്ക് ഓസ്‌ട്രേലിയന്‍ ബാറ്റിംഗ് കരുത്തിന് മേല്‍ ഒരു സമയത്തും ആധിപത്യം നേടാനായില്ല. മുഹമ്മദ് ഷമി 10 ഓവറില്‍ 59 റണ്‍സിന് 3 വിക്കറ്റ് വീഴ്‌ത്തിയപ്പോള്‍ ബുംറയും നവദീപ് സെയ്‌നി, യുസ്‌വേന്ദ്ര ചാഹല്‍ എന്നിവര്‍ ഓരോ വിക്കറ്റും വീഴ്‌ത്തി.
