മിലാൻ: ഇറ്റാലിയൻ ലീഗായ സിരി എയിൽ നിലവിലെ ചാമ്പ്യന്മാർക്ക് നാണംകെട്ട തോൽവി. ക്രിസ്റ്റിയാനോയുടെ ടീം എതിരില്ലാത്ത മൂന്ന് ഗോളിനാണ് തോറ്റത്. ലീഗിൽ 15-ാം സ്ഥാനത്ത് മാത്രമുള്ള ഫിയോറന്റീനയാണ് യുവന്റസിനെ ഞെട്ടിച്ചത്.
കളിയുടെ മൂന്നാം മിനിറ്റിൽത്തന്നെ ദുസാൻ വ്ലാഹോവിച്ചിലൂടെ ഫിയോറന്റീന ആദ്യ ഗോൾ നേടി. 18-ാം മിനിറ്റിൽ ജുവാൻക്വാഡ്രാഡേക്ക് ചുവപ്പ് കാർഡ് കണ്ടതോടെ പതറിയ യുവന്റസിന് പറ്റിയ പാളിച്ച രണ്ടാം ഗോളിലും കലാശിച്ചു. യുവന്റസിന്റെ അലക്സ് സാന്ദ്രോയുടെ സെൽഫ് ഗോളാണ് ഫിയോറന്റീനയ്ക്ക് രണ്ടാം ഗോൾ സമ്മാനിച്ചത്. 81-ാം മിനിറ്റിൽ മാർട്ടിൻ കാസേരസ് മൂന്നാം ഗോളും നേടി. പ്രതിരോധ നിരയ്ക്ക് ക്രിസ്റ്റിയാനോയെ സമർത്ഥമായി തടയാനായതാണ് കളിയുടെ ഗതിമാറ്റിയത്. ഒപ്പം ആക്രമിച്ച് കളിച്ച ഫിയോറന്റീന സീസണിലെ ആദ്യ അട്ടിമറി ജയവും സ്വന്തമാക്കി.
