ന്യൂയോർക്ക്: അമേരിക്കയുടെ പ്രതിരോധമേഖലയടക്കം ശ്രദ്ധിക്കുന്ന സി.ഐ.എയുടെ മേധാവിയെ പ്രഖ്യാപിച്ച് ജോ ബൈഡൻ. നയതന്ത്ര രംഗത്തു നിന്നുള്ള വില്യം ബേണിനാണ് ചുമതല നൽകുന്നത്. ഇറാനുമായി മുൻപ് നിർണ്ണായക ചർച്ചകൾക്ക് നേതൃത്വം കൊടുത്ത പരിചയം അന്താരാഷ്ട്ര രംഗത്തെ വില്യമിന്റെ മികവിന്റെ ഉദാഹരണമെന്നാണ് അമേരിക്കൻ രഹസ്യാന്വേഷണ വിഭാഗം വിലയിരുത്തുന്നത്. രാഷ്ട്രീയത്തിന് അതീതനായ ഒരുവ്യക്തി എന്ന നിലയിലാണ് വില്യം ബേണിന്റെ ഔദ്യോഗിക മികവ് വിലയിരുത്തപ്പെടുന്നത്.
ബൈഡന് ദീർഘകാലം ബന്ധമുള്ള വിദേശകാര്യ വകുപ്പിലെ നയതന്ത്രജ്ഞനെന്നതാണ് വില്യമിന് ഗുണമായത്. ഒബാമയുടെ കീഴിൽ ഇരുവരും നിരവധി വിദേശകാര്യ വിഷയങ്ങളിൽ ഒരുമിച്ച് പ്രവർത്തിച്ചവരുമാണ്. ബൈഡൻ മുൻപ് സെനറ്റർ എന്ന നിലയിൽ വിദേശകാര്യവിഭാഗം സമിതിയുടെ അദ്ധ്യക്ഷനായിരിക്കേ വില്യം ബേണാണ് സഹായത്തിനുണ്ടായിരുന്നത്. ഇത്തവണ ദേശീയ സുരക്ഷാ ഉപദേഷ്ടാവായി ബൈഡൻ തീരുമാനിച്ചിരിക്കുന്ന ജേക് സുള്ളിവനുമായി പ്രവർത്തിച്ച പരിചയവും വില്യം ബേണിനെ പ്രിയങ്കരനാക്കുന്നു.
