മിലാൻ: ഇറ്റാലിയൻ ലീഗിൽ യുവന്റസ് വിജയക്കുതിപ്പിൽ. രണ്ടാം മത്സരത്തിൽ നാപ്പോളിയെ അട്ടിമറിച്ച് വെറോണ മികച്ച ജയം നേടി. മറ്റ് മത്സരങ്ങളിൽ ഫിയോറന്റീന, ജെനോവ, ലാസിയോ, സാംപദോറിയ എന്നിവരും എതിരാളികളെ പരാജയപ്പെടുത്തി.
യുവന്റസ് എതിരില്ലാത്ത രണ്ടു ഗോളുകൾക്കാണ് ബൊവോഗ്നയെ തോൽപ്പിച്ചത്. രണ്ടു പകുതികളിലായാണ് ഗോളുകൾ വീണത്. ആർതർ മെലോ 15-ാം മിനിറ്റിലും വെസ്റ്റൺ മെക്കെന്നി 71-ാം മിനിറ്റിലും ഗോളടിച്ചു.
ഇറ്റാലിയൻ കരുത്തരായ നാപ്പോളിയെ ഒന്നിനെതിരെ മൂന്ന് ഗോളുകൾക്കാണ് വെറോണ മുട്ടുകുത്തിച്ചത്. കളിയുടെ ആദ്യ നിമിഷത്തിൽ ഗോളടിച്ച നാപ്പോളിക്കെതിരെ മൂന്ന് ഗോളുകളാണ് വെറോണ തിരിച്ചടിച്ച് ഞെട്ടിച്ചത്. 34-ാം മിനിറ്റിൽ ഫെഡ്രികോ ഡിമാർകോയാണ് വെറോണയ്ക്കായി സമനില പിടിച്ചത്. തുടർന്ന് രണ്ടാം പകുതിയിൽ ആന്റോനിൻ ബാരാക് 62-ാം മിനിറ്റിലും 79-ാം മിനിറ്റിൽ മാഷിയ സാക്കാഗ്നിയും നാപ്പോളിയുടെ വല ചലിപ്പിച്ചു.
മറ്റ് മത്സരങ്ങളിൽ ഫിയോറന്റീന 2-1ന് ക്രോട്ടണയെ തോൽപ്പിച്ചപ്പോൾ ജെനോവ 1-0ന് കാഗ്ലിയാരിക്കെതിരെ ജയം നേടി. ലാസിയോ 2-1ന് സാസുവോളയേയും 2-0ന് സാംപദോറിയ പാർമയേയും പരാജയപ്പെടുത്തി.
Comments