ബംഗളൂരു: വിജയ് ഹസാരെ ടൂർണമെൻ്റിൽ കേരളം ക്വാർട്ടറിൽ. അഞ്ച് എലൈറ്റ് ഗ്രൂപ്പുകളിലെ ഒന്നാം സ്ഥാനക്കാരായി ഗുജറാത്തും ആന്ധ്രാപ്രദേശും കർണാടകയും മുംബൈയും സൗരാഷ്‌ട്രയും ക്വാർട്ടറിലെത്തിയപ്പോൾ മികച്ച രണ്ടാം സ്ഥാനക്കാരായാണ് കേരളവും ഉത്തർപ്രദേശും ക്വാർട്ടർ ബർത്തുറപ്പിച്ചത്. കണക്കിലെ കളികളാണ് കേരളത്തിന് തുണയായത്.
കഴിഞ്ഞ ദിവസം നടന്ന മത്സരത്തിൽ ഗുജറാത്തിനെതിരെ ബറോഡ തോറ്റതും രാജസ്ഥാനെതിരെ ഡൽഹിക്ക് മികച്ച റൺ റേറ്റിൽ ജയിക്കാൻ കഴിയാത്തതുമാണ് കേരളത്തിന് ക്വാർട്ടറിലേയ്‌ക്ക് വഴിയൊരുക്കിയത്. രാജസ്ഥാൻ ഉയർത്തിയ 295 റൺസ് എന്ന വിജയലക്ഷ്യം മറികടക്കാൻ ഡൽഹിക്ക് 44.4 ഓവർ വേണ്ടി വന്നതാണ് നെറ്റ് റൺറേറ്റിൽ കേരളത്തിന് അനുകൂലമായി കാര്യങ്ങൾ കൊണ്ടെത്തിച്ചത്.
ഈ മാസം 8 മുതൽ ഡൽഹിയിലാണ് ക്വാർട്ടർ പോരാട്ടങ്ങൾ നടക്കുക. അതേസമയം,സഞ്ജു സാംസണ് പരിക്കേറ്റത് കേരളത്തിന് തിരിച്ചടിയായി. ഇതോടെ ക്വാർട്ടർ മത്സരങ്ങൾക്കുള്ള ടീമിൽ സഞ്ജുവിന് പകരക്കാരനായി പേസ് ബോളർ ബേസിൽ തമ്പിയെ ഉൾപ്പെടുത്തി.
