ബാഴ്സലോണ: സ്പാനിഷ് ഫുട്ബോൾ ക്ലബ് ബാഴ്സലോണയുടെ ഓഫീസിൽ പോലീസ് റെയ്ഡ്. ഇന്ന് രാവിലെയാണ് ബാഴ്സലോണയുടെ ഓഫീസിൽ പോലീസ് റെയ്ഡ് നടത്തിയത്. അന്താരാഷ്ട്ര മാദ്ധ്യമങ്ങളാണ് ഇക്കാര്യം റിപ്പോർട്ട് ചെയ്തത്.
ബാഴ്സലോണയുടെ മുൻ പ്രസിഡന്റായ ജോസഫ് മരിയ ബെർതമ്യുവിനെ പോലീസ് അറസ്റ്റ് ചെയ്തതായും റിപ്പോർട്ടുണ്ട്. ബെർതമ്യു അടക്കം 6 പേർ അറസ്റ്റിലായെന്നാണ് റിപ്പോർട്ട്. പ്രസിഡൻഷ്യൽ തെരഞ്ഞെടുപ്പിന് 6 ദിവസം മാത്രം ബാക്കി നിൽക്കെയാണ് അറസ്റ്റ് നടന്നിരിക്കുന്നത്. ബെർതമ്യുവിന് പുറമെ ഓസ്കാർ ഗ്രൗ, ക്ലബിന്റെ നിയമ വിഭാഗം തലവൻ എന്നിവരും അറസ്റ്റിലായവരിലുണ്ടെന്ന് വിവിധ സ്പാനിഷ് മാദ്ധ്യമങ്ങൾ റിപ്പോർട്ട് ചെയ്തു.
അതേസമയം, അറസ്റ്റിലായവരുടെ പേരുകൾ പുറത്തുവിടാൻ പോലീസ് തയ്യാറായിട്ടില്ല. അറസ്റ്റുകൾ നടക്കുന്നു എന്ന വിശദീകരണം മാത്രമാണ് പോലീസ് നൽകുന്നത്. ഫിനാൻഷ്യൽ ക്രൈം യൂണിറ്റുമായി ചേർന്നാണ് പോലീസ് റെയ്ഡ് നടത്തിയത്. ബാഴ്സ ഗേറ്റ് വിവാദവുമായി ബന്ധപ്പെട്ടാണ് അറസ്റ്റ് നടന്നതെന്നാണ് സൂചന.
