ന്യൂഡൽഹി: വ്യോമസേനയുടെ ആയുധ ശേഖരത്തിലേയ്ക്ക് പുത്തൻ സംഭാവനയുമായി ഡിആർഡിഒ. സോളിഡ് ഫ്യുവൽ ഡക്റ്റഡ് റാംജെറ്റ് മിസൈൽ ഡിആർഡിഒ വിജയകരമായി പരീക്ഷിച്ചു. ഒഡീഷയിലെ ബലാസോറിലാണ് പരീക്ഷണം നടന്നത്.
തദ്ദേശീയമായി വികസിപ്പിച്ച സോളിഡ് ഫ്യുവൽ ഡക്റ്റഡ് റാംജെറ്റ് മിസൈലിന്റെ രണ്ടാം പതിപ്പാണ് വിജയകരമായി പരീക്ഷിച്ചത്. ഗ്രൗണ്ട് ബൂസ്റ്റർ മോട്ടറും നോസിൾ ലെസ് മോട്ടറും മികച്ച രീതിയിൽ പ്രവർത്തിച്ചു. ഗ്രൗണ്ട് ബൂസ്റ്ററിന്റെ വേർപ്പെടൽ കൃത്യമായ രീതിയിൽ നടന്നെന്നും പരീക്ഷണത്തിൽ നിരവധി ആധുനിക സാങ്കേതിക വിദ്യകൾ കണ്ടെത്തിയെന്നും ഡിആർഡിഒ അറിയിച്ചു.
സോളിഡ് ഫ്യുവൽ ഡക്റ്റഡ് റാംജെറ്റ് മിസൈലിന്റെ വിജയകരമായ പരീക്ഷണം എയർ ടു എയർ ലോംഗ് റേഞ്ച് മിസൈലുകൾ വികസിപ്പിക്കാൻ സഹായകമാകുമെന്നാണ് ഡിആർഡിഒയുടെ വിലയിരുത്തൽ. ഉയർന്ന പ്രദേശങ്ങളിൽ ഉപയോഗിക്കാൻ സാധിക്കുന്ന രീതിയിലാണ് സോളിഡ് ഫ്യുവൽ ഡക്റ്റഡ് റാംജെറ്റ് മിസൈൽ രൂപകൽപ്പന ചെയ്തിരിക്കുന്നത്. സോളിഡ് ഫ്യുവൽ ഡക്റ്റഡ് മിസൈൽ ടെക്നോളജി ചുരുക്കം ചില രാജ്യങ്ങൾക്ക് മാത്രമാണുള്ളതെന്നും ഡിആർഡിഒ അറിയിച്ചു.
