ന്യൂഡൽഹി: ഐസിസി ടെസ്റ്റ് റാങ്കിംഗിൽ ഒന്നാം സ്ഥാനം തിരിച്ചുപിടിച്ച് ഇന്ത്യ. ഇംഗ്ലണ്ടിനെതിരായ ടെസ്റ്റ് പരമ്പര 3-1ന് സ്വന്തമാക്കിയതോടെയാണ് ഇന്ത്യ വീണ്ടും ഒന്നാം സ്ഥാനത്തേയ്‌ക്ക് തിരിച്ചെത്തിയത്. ഇംഗ്ലണ്ടിനെതിരായ ഇന്ത്യയുടെ പരമ്പരയ്‌ക്ക് മുൻപ് ന്യൂസിലൻഡായിരുന്നു ഒന്നാമത്.
122 പോയിന്റുമായാണ് ഇന്ത്യ ഒന്നാം സ്ഥാനത്ത് എത്തിയത്. തൊട്ടുപിന്നിൽ 118 പോയിന്റുമായി ന്യൂസിലൻഡാണ് രണ്ടാമത്. 113 പോയിന്റുമായി ഓസ്‌ട്രേലിയ മൂന്നാം സ്ഥാനത്തും 105 പോയിന്റുമായി ഇംഗ്ലണ്ട് നാലാം സ്ഥാനത്തുമാണ്. ഇംഗ്ലണ്ടിനെതിരായ പരമ്പര വിജയത്തോടെ ലോക ടെസ്റ്റ് ചാമ്പ്യൻഷിപ്പിനും ഇന്ത്യ കഴിഞ്ഞ ദിവസം യോഗ്യത നേടിയിരുന്നു.
ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിൽ 520 പോയിന്റുമായി ഒന്നാം സ്ഥാനക്കാരായാണ് ഇന്ത്യ ഫിനിഷ് ചെയ്തത്. 6 സീരിസുകളിൽ 12 വിജയവും 4 തോൽവിയും ഒരു സമനിലയുമായാണ് ഇന്ത്യ പോയിന്റ് പട്ടികയുടെ തലപ്പത്ത് എത്തിയത്. 420 പോയിന്റുമായി ന്യൂസിലൻഡാണ് രണ്ടാം സ്ഥാനത്ത്. 5 സീരീസുകളിൽ 7 ജയവും 4 തോൽവിയുമാണ് കീവീസിന്റെ അക്കൗണ്ടിലുള്ളത്. ജൂൺ 18ന് ലോർഡ്‌സിലാണ് ഫൈനൽ നടക്കുക.
