അഹമ്മദാബാദ്: ഇംഗ്ലണ്ടിനെതിരെ ബാറ്റിംഗിൽ തിളങ്ങാനാകാത്ത ക്ഷീണം കെ.എൽ.രാഹുൽ ഒറ്റ ഫീൽഡിംഗിൽ തീർത്തു. ബൗണ്ടറി ലൈനിൽ ഇരു കൈകളും നീട്ടി വായുവിൽ മലർന്ന് കൈക്കുള്ളിലാക്കിയ പന്ത് താൻ നിലത്ത് വീഴും മുൻപേ ബൗണ്ടറി കടക്കാതെ തിരിച്ചെറിഞ്ഞായിരുന്നു രാഹുലിന്റെ പ്രകടനം. അസാധാരണ മെയ് വഴക്കത്തോടെ നടത്തിയ ഫീൽഡിംഗ് രാഹുലിനെ താരമാക്കി. ഇന്ത്യ എട്ടുവിക്കറ്റിന് പരാജയപ്പെട്ട മത്സരത്തിനിടെ കാണികളുടെ നിരാശ ഒരളവോളം പരിഹരിച്ചതിലൊന്ന് രാഹുലിന്റെ ഫീൽഡിംഗിലെ ഈ മിന്നും പ്രകടനമായിരുന്നു.
Amazing fielding by KL Rahul #IndiavsEngland #INDvsEND #1stT20 pic.twitter.com/NebyVSkGDl
— Secret Superstar (@InstaSSKKL) March 12, 2021
ഇംഗ്ലീഷ് ബാറ്റ്സ്മാൻ ജോസ് ബട്ലർ സിക്സർ ഉറപ്പിച്ച ഷോട്ടാണ് രാഹുൽ അസാമാന്യമികവോടെ കയ്യിലാക്കിയത്. ബട്ലർക്ക് ആ ഷോട്ടിലാകെ രണ്ടു റൺസാണ് നേടാനായത്. അക്ഷർ പട്ടേലിന്റെ പന്തിലാണ് രാഹുലിന്റെ ക്യാച്ച്. മികച്ച കീപ്പർ കൂടിയായ രാഹുലിന്റെ മനസ്സാന്നിദ്ധ്യവും മെയ് വഴക്കവും തെളിയിക്കുന്ന സംഭവമായി ക്രിക്കറ്റ് വിദഗ്ധർ പ്രകടനത്തെ വിലയിരുത്തുകയാണ്. രാഹുലിന്റെ പ്രകടനത്തിന്റെ വീഡിയോ ആരാധകർ ട്വിറ്ററിലൂടെയാണ് ആദ്യം ആസ്വദിച്ചത്. തുടർന്ന് നിരവധി പേരാണ് മണിക്കൂറുകൾക്കുള്ളിൽ രാഹുലിനെ ഏറ്റെടുത്തത്.
