പൂന്തോട്ടം വീടിന് ഒരഴകു തന്നെയാണ്. എന്നാല് വേനല്ക്കാലം ആകുന്നതോടു കൂടി പൂന്തോട്ടത്തിന് ശോഭ കുറഞ്ഞു വരും. ഭൂരിഭാഗം ചെടികളും വാടി തുടങ്ങും. ചിലത് ഉണങ്ങി നശിച്ചു പോകുകയും ചെയ്യും. എന്നാല് പൂന്തോട്ടത്തെ അതിന്റെ ഭംഗി പോകാതെ നിലനിര്ത്താന് അല്ലെങ്കില് വേനല്ക്കാലത്തും വസന്തം നിറയ്ക്കുന്ന കുറച്ച് പൂക്കളെ അറിയാം.
ചെണ്ടുമല്ലി
വേനല് പൂക്കളില് പ്രധാനപ്പെട്ട ഒന്നാണ് ചെണ്ടുമല്ലി. വേനലിനെ പോലെ തന്നെ തീഷ്ണമായ നിറവും ചെണ്ടുമല്ലിയുടെ ഒരു പ്രത്യേകതകളാണ്. മറ്റു ചെടികളെ അപേക്ഷിച്ച് വളരെ പെട്ടെന്ന് തന്നെ വളരുന്ന ഒന്നാണിത്. പ്രത്യേകമായ വളം ഒന്നും തന്നെ വേണ്ട. വേനലിന്റൈ ചൂടിലും തളരാത്ത നില്ക്കും ചെണ്ടുമല്ലി.
റോസ്
പൂന്തോട്ടങ്ങളെ ഏറ്റവും സുന്ദരമാക്കുന്നത് വിവിധ തരത്തിലുള്ള റോസാപ്പൂക്കള് ആണ്. റോസ് ചെടി നടുമ്പോള് വളരെയേറെ ശ്രദ്ധയോടുകൂടി ചാണകപ്പൊടി, കമ്പോസ്റ്റ് എന്നിവ ചേര്ത്ത് ചട്ടിയില് വേണം നടാന്. എന്നാല് ചെടി വളര്ന്നു കഴിഞ്ഞാല് പിന്നെ നിറയെ പൂവിടാന് തുടങ്ങും. വേനല് ചൂടൊന്നും അതിനെ ബാധിക്കുകയില്ല.
സൂര്യകാന്തി
സൂര്യന് പോലെ തന്നെ തിളങ്ങി നില്ക്കുന്ന സൂര്യകാന്തിക്ക് അതികഠിനമായ ചൂട് ഒരു പ്രശ്നമല്ല. സൂര്യ പ്രകാശം ലഭിക്കുന്ന തുറന്ന സ്ഥലത്താണ് സൂര്യകാന്തി നടേണ്ടത്. വളരാന് ആവശ്യത്തിനു മാത്രം വെള്ളം ഒഴിച്ചാല് മതി
ജമന്തി
പൂന്തോട്ടങ്ങളെ ആകര്ഷകമാക്കുന്ന മറ്റൊരു ചെടിയാണ് ജമന്തി. ഏഴു ദിവസം വരെ വാടാതെ നില്ക്കാന് ജമന്തിക്ക് സാധിക്കും. വിവിധ തരത്തിലുള്ള ജമന്തികള് ഇന്ന് ലഭ്യമാണ്. മണ്ണില് വേരു പിടിച്ചു കഴിഞ്ഞാല് പിന്നെ ജമന്തി നന്നായി വളരുന്നു. ഇതിന് വേനല്ക്കാലം മഴക്കാലം എന്നൊരു വ്യത്യാസമില്ലാതെ നന്നായി തന്നെ തഴച്ചു വളരുന്നു.
ചെമ്പരത്തി
വീടുകളിലെ പൂന്തോട്ടങ്ങളില് നിത്യവും കാണുന്ന ഒന്നാണ് ചെമ്പരത്തി. വിവിധ തരത്തിലുള്ള ചെമ്പരത്തികള് കണ്ടു വരാറുണ്ട്. മഴയിലും വെയിലിലും ഒരുപോലെ വളരുന്ന ഒന്നാണ് ചെമ്പരത്തി. വേനലില് ചെമ്പരത്തിപ്പൂക്കള്ക്ക് പ്രത്യേക തിളക്കം തന്നെയാണ്.
Comments