ശ്രീനഗർ: ബി.ജെ.പി നേതാവ് അൻവർ ഖാന്റെ സുരക്ഷാ ഉദ്യോഗസ്ഥന് ജമ്മുകശ്മീർ പോലീസിന്റെ അന്ത്യാജ്ഞലി. ലഷ്‌ക്കർ ഭീകരരുടെ ആക്രമണത്തിലാണ് റമീസ് രാജയെന്ന അംഗരക്ഷകൻ കൊല്ലപ്പെട്ടത്. ആശുപത്രിയിലേക്ക് പോകും വഴിയാണ് ദേഹം നിറയെ വെടിയുണ്ടയേറ്റുവാങ്ങിയ ജമ്മുപോലീസ് ഓഫീസർ മരണത്തിന് കീഴടങ്ങിയത്. പോസ്റ്റ്മാർട്ടത്തിന് ശേഷം ബന്ധുക്കൾക്ക് വിട്ടു നൽകിയ മൃതദേഹം സമ്പൂർണ്ണ ഔദ്യോഗിക ബഹുമതികളോടെയാണ് കബറടക്കിയത്.
ജമ്മുകശ്മീരിന്റെ സുരക്ഷയ്‌ക്കായി നിയോഗിക്കപ്പെട്ടിട്ടുള്ള സി.ആർ.പി.എഫ് ഉന്നത ഉദ്യോഗസ്ഥരും ജമ്മുകശ്മീർ പോലീസിന്റെ ഉന്നത ഉദ്യോഗസ്ഥരും ചേർന്നാണ് വീരബലിദാനിയായ റമീസ് രാജയ്ക്ക് അന്ത്യാഞ്ജലി അർപ്പിച്ചത്. ഭീകരർക്കെ തിരായ പോരാട്ടത്തിൽ സമാനതകളില്ലാത്ത ബലിദാനമാണ് റമീസിന്റേതെന്ന് സി.ആർ.പി.എഫ് അനുശോചന സന്ദേശത്തിൽ കുറിച്ചു.
ബുർഖ ധരിച്ചെത്തിയ ഭീകരർ അൻവർഖാന്റെ വീട്ടിൽ കയറിയാണ് ആക്രമണം നടത്തിയത്. നാല് ഭീകരർ ആക്രമണം നടത്തിയിട്ടും സധൈര്യം ഇവരെ നേരിട്ടാണ് റമീസ് രാജ മരണത്തിന് കീഴടങ്ങിയത്.
