കാറിലിടിച്ച് നിർത്താതെ പോയ ആളെ തിരഞ്ഞ് സംവിധായകൻ ജൂഡ്: കുറ്റസമ്മതം നടത്തി യുവാവ്

കൊച്ചി: കാറിലിടിച്ച് നിർത്താതെ പോയ ആളെ തിരഞ്ഞ് സോഷ്യൽ മീഡിയയിൽ പോസ്റ്റുമായി സംവിധായകൻ ജൂഡ് ആന്റണി ജോസഫ്. കാറിന് ഇൻഷുറൻസ് ലഭിക്കണമെങ്കിൽ ഇടിച്ച വാഹനവും വേണം. അതുകൊണ്ട് ഇടിച്ചയാൾ മുന്നോട്ട് വരണം എന്ന് ആവശ്യപ്പെട്ടായിരുന്നു സംവിധായകന്റെ ഫേസ്ബുക്ക് പോസ്റ്റ്. പോസ്റ്റിട്ട് മണിക്കൂറുകൾക്കകം കുറ്റസമ്മതം നടത്തി സംവിധായകന് മുന്നിൽ എത്തിയിരിക്കുകയാണ് രോഹിത്ത് എന്ന യുവാവ്.

‘എന്റെ പാവം കാറിനിട്ട് ഇടിച്ചു ഈ കോലത്തിലാക്കിയ മഹാനെ നിങ്ങൾ ആരാണെങ്കിലും ഒരഭ്യർത്ഥന നിങ്ങളുടെ കാറിനും സാരമായി പരുക്ക് പറ്റി കാണുമല്ലോ , ഇൻഷുറൻസ് ക്ലെയിം കിട്ടാൻ ജിഡി എൻട്രി നിർബന്ധമാണ്. അതിന് സഹകരിക്കണം. മാന്യത അതാണ് . ഇല്ലേലും സാരമില്ല . നമ്മളൊക്കെ മനുഷ്യരല്ലേ?’ എന്നാണ് ജൂഡ് ഫേസ്ബുക്കിൽ കുറിച്ചത്. സംവിധായകന്റെ പോസ്റ്റ് കണ്ടതിനെ തുടർന്നാണ് യുവാവ് തന്റെ വാഹനമാണ് ജൂഡിന്റെ വണ്ടിയിൽ ഇടിച്ചതെന്ന് പറഞ്ഞ് മുന്നോട്ട് വന്നത്.

ഒരു പൂച്ച കുറുകെ ചാടിയപ്പോൾ നിയന്ത്രണം വിട്ട് സംഭവിച്ചതാണെന്നും രാത്രി ആയതിനാലാണ് നിർത്താതെ പോയതെന്നുമാണ് യുവാവ് പറഞ്ഞത്. സംഭവം തുറന്നു പറഞ്ഞ രോഹിത്തിന് നന്ദി അറിയിച്ച് മറ്റൊരു വീഡിയോയും ജൂഡ് പോസ്റ്റ് ചെയ്തു. കുറ്റസമ്മതം നടത്തിയ രോഹിത്തിനെ ജൂഡ് അഭിനന്ദിക്കുകയും അദ്ദേഹത്തിനൊപ്പം ഫേസ്ബുക്ക് ലൈവ് വരികയും ചെയ്തിരുന്നു.