അഹമ്മദാബാദ് : നിലവിലെ ചാമ്പ്യന്മാരായ മുംബൈ ഇന്ത്യൻസിനെ 9 വിക്കറ്റിന് തകർത്ത് പഞ്ചാബ് കിംഗ്സ്. യൂണിവേഴ്സൽ ബോസും ക്യാപ്ടൻ കെ.എൽ രാഹുലും തകർത്തടിച്ചപ്പോൾ മുംബൈ ഇന്ത്യൻസ് ഉയർത്തിയ 132 റൺസ് വിജയ ലക്ഷ്യം പതിനെട്ടാം ഓവറിൽ ഒരു വിക്കറ്റ് നഷ്ടത്തിൽ പഞ്ചാബ് മറികടന്നു. ക്യാപ്ടന്റെ ഇന്നിംഗ്സ് കാഴ്‌ച്ച വച്ച കെ.എൽ രാഹുൽ 52 പന്തിൽ 60 റൺസുമായും ക്രിസ് ഗെയ്‌ൽ 35 പന്തിൽ 43 റൺസുമായും പുറത്താകാതെ നിന്നു. കെ.എൽ രാഹുലാണ് മാൻ ഓഫ് ദ മാച്ച്.
ആദ്യം ബാറ്റ് ചെയ്ത മുംബൈ ഇന്ത്യൻസിന് 20 ഓവറിൽ 6 വിക്കറ്റ് നഷ്ടത്തിൽ 131 റൺസെടുക്കാനേ കഴിഞ്ഞുള്ളൂ. പഞ്ചാബ് ബൗളർമാർ പിശുക്ക് കാട്ടി പന്തെറിഞ്ഞപ്പോൾ ലോകോത്തര ബാറ്റ്സ്മാന്മാർ നിറഞ്ഞ മുംബൈ നിരയ്‌ക്ക് അതിന്റെ മറികടക്കാനായില്ല. 52 പന്തിൽ 63 റൺസെടുത്ത ക്യാപ്ടൻ രോഹിത് ശർമ്മയാണ് ടോപ് സ്കോറർ. സൂര്യകുമാർ യാദവ് 27 പന്തിൽ 33 റൺസെടുത്തു. ഫോം കണ്ടെത്താനാകാതെ ഉഴറിയ കീറൻ പൊള്ളാർഡിന് പന്ത്രണ്ട് പന്തിൽ 16 റൺസെടുക്കാനേ കഴിഞ്ഞുള്ളൂ.
തോറ്റെങ്കിലും മുംബൈ ഇന്ത്യൻസ് നാലാം സ്ഥാനത്ത് തന്നെ തുടരുകയാണ്. ഈ ജയത്തോടെ പഞ്ചാബ് കിംഗ്സ് അഞ്ചാം സ്ഥാനത്തേക്കെത്തി. രാജസ്ഥാൻ റോയൽസും കൊൽക്കത്ത നൈറ്റ് റൈഡേഴ്സും തമ്മിലാണ് അടുത്ത മത്സരം.
