അഹമ്മദാബാദ്: ഐ.പി.എല്ലിൽ ഇന്ന് കരുത്തന്മാരുടെ പോരാട്ടം. വിരാട് കോഹ്ലി നയിക്കുന്ന റോയൽ ചലഞ്ചേഴ്സ് ബാംഗ്ലൂരും ഋഷഭ് പന്തിന്റെ ഡൽഹി ക്യാപ്പിറ്റൽസുമാണ് ഇന്ന് ഏറ്റുമുട്ടുന്നത്. കഴിഞ്ഞ മത്സരത്തിൽ ചെന്നൈയ്ക്ക്തിരെ 69 റൺസിന്റെ കനത്ത തോൽവി ഏറ്റുവാങ്ങിയാണ് കോഹ്ലിപ്പട ഇറങ്ങുന്നത്. സൂപ്പർ ഓവറിൽ ഹൈദരാബാദിനെയാണ് ഡൽഹി തോൽപ്പിച്ചത്. ഇരു ടീമുകളും അഞ്ചുകളികളിൽ ഇതുവരെ ഒരു കളി വീതം മാത്രമാണ് തോറ്റതെന്നത് വീറും വാശിയും കൂട്ടും.
ചെന്നൈയ്ക്കെതിരെ ബൗളിംഗിൽ അപ്രതീക്ഷിതമായുണ്ടായ അവസാന ഓവറിലെ കൂട്ടപ്പൊരിച്ചിലാണ് ബാംഗ്ലൂരിന് വിനയായത്. അവസാന ഓവറിൽ 37 റൺസ് ഒറ്റയ്ക്ക് അടിച്ചെടുത്ത രവീന്ദ്രജഡേജയുടെ വെടിക്കെട്ട് ബാറ്റിംഗ് പ്രതീക്ഷയ്ക്കപ്പുറമായിരുന്നു. അതേ സമയം മികച്ച ഫോമിലുള്ള ദേവ്ദത്ത് പടിക്കലും എ.ബി.ഡിവില്ലിയേഴ്സും മാക്സ്വെല്ലും തിളങ്ങിയാൽ കളിമാറും.
ഡൽഹിയെ സംബന്ധിച്ച് രാജസ്ഥാനോട് ഏറ്റ തോൽവി മാത്രമാണ് ഇതുവരെ ഏറ്റുവാങ്ങിയത്. കഴിഞ്ഞ കളിയിൽ ഹൈദരാബാദിനെതിരെ സൂപ്പർ ഓവർ വരെ പോയ മത്സരത്തിൽ ഭാഗ്യവും തുണച്ചു. അക്ഷർ പട്ടേലിന്റെ സ്പിൻ കരുത്ത് ആവർത്തിച്ചാൽ ഡൽഹി വീണ്ടും വിജയം ആവർത്തിക്കും.
