ഇറ്റലി : വാർത്താ സമ്മേളനത്തിൽ കൊക്കോ കോളയുടെ കുപ്പികൾ എടുത്തു മാറ്റി ഇറ്റലി താരം ലൊക്കാറ്റലിയും. സ്വിറ്റ്സർലാന്റിനെതിരെ നടന്ന മത്സരത്തിന് ശേഷം നടത്തിയ വാർത്താ സമ്മേളനത്തിലാണ് മാദ്ധ്യമങ്ങൾക്കു മുൻപിൽവെച്ച് താരം കുപ്പികൾ എടുത്തു മാറ്റിയത്. കഴിഞ്ഞ ദിവസം പോർച്ചുഗീസ് താരം ക്രിസ്റ്റ്യാനോ റൊണാൾഡോ കുപ്പികൾ എടുത്തു മാറ്റിയത് വൻ സാമ്പത്തിക നഷ്ടമാണ് കൊക്കോ കോളയ്ക്ക് സമ്മാനിച്ചത്.
മത്സരത്തിൽ ഇരട്ട ഗോൾ സ്വന്തമാക്കി താരമായി തെരഞ്ഞെടുക്കപ്പെട്ടതിന് ശേഷമായിരുന്നു ലൊക്കാറ്റലി മാദ്ധ്യമങ്ങളെ കാണാൻ എത്തിയത്. ഇതിനായി സജ്ജീകരിച്ച മേശയിൽ കൊക്കോ കോള കുപ്പികളും വെള്ളം കുപ്പിയും വെച്ചിരുന്നു. എന്നാൽ റൊണാൾഡോയുടെ മാതൃക സ്വീകരിച്ച ലൊക്കാറ്റലി കൊക്കോ കോള കുപ്പികൾ എടുത്തു മാറ്റുകയായിരുന്നു. വെള്ളം കുപ്പി മുന്നിലേക്ക് എടുത്തു വയ്ക്കുകയും ചെയ്തിരുന്നു. യൂറോ കപ്പിലെ പ്രധാന സ്പോൺസർമാരിലൊരാളാണ് കൊക്കോ കോള.
യൂറോ കപ്പിൽ ഹംഗറിയും, പോർച്ചുഗലും തമ്മിലുള്ള മത്സരത്തിന് മുന്നോടിയായി നടത്തിയ വാർത്താ സമ്മേളനത്തിനിടെയാണ് റൊണാൾഡോ കുപ്പികൾ മാറ്റിവെച്ചത്. ഇതിന്റെ ദൃശ്യങ്ങൾ സമൂഹ മാദ്ധ്യമങ്ങളിൽ വ്യാപകമായി പ്രചരിച്ചിരുന്നു. ഇതോടെ കോടിക്കണക്കിന് രൂപയുടെ നഷ്ടമാണ് കമ്പനിക്ക് ഉണ്ടായതെന്നാണ് റിപ്പോർട്ടുകൾ.
