മെൽബൺ: ഇന്ത്യൻ ക്രിക്കറ്റിലെ പേസ് ബൗളർമാർക്ക് അഭിനന്ദനവുമായി മുൻ ഓസീസ് ക്രിക്കറ്റ് ഇതിഹാസം ഇയാൻ ചാപ്പൽ. ടീം ഇന്ത്യയുടെ ബൗളിംഗ് നിര ഇന്ന് ലോകോത്തര നിലവാരമുള്ളവരുടേതെന്ന് ഇയാൻ ചാപ്പൽ പറഞ്ഞു. വിരാട് കോഹ്ലി നയിക്കുന്നത് ഇന്ന് ഏറ്റവും മികച്ച പേസ് നിരയടങ്ങുന്ന ടീമിനെയാണെന്നും എല്ലാവരും ലോകത്തെ ഏതു ടീമിനേയും തോൽപ്പിക്കാൻ ശേഷിയുള്ളവരാണെന്നും ഇയാൻ ചാപ്പൽ പറഞ്ഞു.
ലോകടെസ്റ്റ് ചാമ്പ്യൻഷിപ്പിൽ ഇന്ത്യ തോറ്റതിനെ ഇയാൻ ചാപ്പൽ കാര്യമായി എടുക്കുന്നില്ല. എന്നാൽ ഇന്ന് ഇന്ത്യയുടെ പേസ് നിര ഒരു കളി സ്വന്തമാക്കാൻ ക്ഷമതയുള്ളവരാണ്. ഇഷാന്ത് ശർമ്മ, ജസ്പ്രീത് ബുംറ, മുഹമ്മദ് ഷമി, മുഹമ്മദ് സിറാജ് എന്നിവരെ പേരെടുത്ത് പറഞ്ഞാണ് ചാപ്പൽ പ്രശംസ ചൊരിയുന്നത്.
ഓസ്‌ട്രേലിയയെ ഇതുപോലെ മെരുക്കിയ ഒരു ഇന്ത്യൻ പേസ് നിര മുമ്പ് ഉണ്ടായിട്ടില്ല. ലോക ടെസ്റ്റ് ചാമ്പ്യൻഷിപ്പിന്റെ ഫൈനലിലേയ്‌ക്ക് ഇന്ത്യ യോഗ്യത നേടിയ പ്രകടനത്തിൽ പേസ് ബൗളർമാരുടെ വീറുറ്റ പ്രകടനമാണ് ചാപ്പലിനെപ്പോലെ നിരവധി ക്രിക്കറ്റ് പ്രതിഭകൾ വാഴ്‌ത്തുന്നത്. അതേ സമയം ന്യൂസിലന്റിന്റെ പേസ് നിരയുടെ ഗുണനിലവാരമാണ് ഇന്ത്യക്ക് മേൽ നിർണ്ണായക വിജയം നേടാൻ സഹായിച്ചതെന്നും ചാപ്പൽ പറഞ്ഞു. ടിം സൗത്തി, ട്രെൻഡ് ബോൾട്ട്, നീൽ വാഗ്നർ, കെയിൽ ജാമിസൺ എന്നിവരുടെ സ്ഥിരതയാർന്ന പ്രകടനവും ചാപ്പൽ എടുത്തുപറഞ്ഞു.
ലോക ക്രിക്കറ്റിനെ 1970-1990 വരെ അടക്കിഭരിച്ച വെസ്റ്റിൻഡീസ് പേസ് നിരയുടെ മാരക പ്രഹരശേഷി ചാപ്പൽ താരതമ്യം ചെയ്തു. ന്യൂസിലന്റും ഇന്ത്യയും അതേ നിലവാരത്തിലേക്ക് എത്തുന്നുവെന്നും ചാപ്പൽ പറഞ്ഞു.
