ബ്രസീലിയ: കോപ്പാ അമേരിക്കയിൽ മൂന്നാം സ്ഥാനത്തിനായുള്ള പോരാട്ടം നാളെ പുലർച്ചെ നടക്കും. സെമിയിൽ കാലിടറിയ കൊളംബിയയും പെറുവുമാണ് മൂന്നാം സ്ഥാനത്തിനായി ഏറ്റുമുട്ടുന്നത്. ആദ്യ സെമിയിൽ ഏക ഗോളിനാണ് ബ്രസീൽ പെറുവിനെ തോൽപ്പിച്ചത്. രണ്ടാം സെമിയിൽ നിശ്ചിത സമയത്ത് ഓരോ ഗോളടിച്ച് സമനിലയിലായ അർജ്ജന്റീന പെനാൽറ്റി ഷൂട്ടൗട്ടിൽ കൊളംബിയയെ 3-2ന് തോൽപ്പിച്ചത്.
കരുത്തരായ ഉറുഗ്വയെ ക്വാർട്ടറിൽ പെനാൽറ്റി ഷൂട്ടൗട്ടിലൂടെ 4-2ന് തോൽപ്പിച്ചാണ് കൊളംബിയ സെമിയിൽ മെസ്സിയുടെ ടീമിനെതിരെ കളിച്ചത്. ഗ്രൂപ്പ് ഘട്ടത്തിൽ ബ്രസീലിനോട് 2-1നാണ് കൊളംബിയ തോറ്റത്. ബ്രസീലിനെതിരെ ശക്തമായ പ്രതിരോധം തീർത്ത പെറു ഏക ഗോളിനാണ് സെമിയിൽ തോറ്റത്. ക്വാർട്ടറിൽ പരാഗ്വയുമായി നിശ്ചിത സമയത്ത് മൂന്ന് ഗോളുകൾ വീതം അടിച്ച് സമനില പിടിച്ച പെറു പെനാൽറ്റി ഷൂട്ടൗട്ടിൽ 4-3നാണ് സെമിയിൽ കടന്നത്.
