ലണ്ടൻ: ഇംഗ്ലണ്ട് പര്യടനത്തിലെ ടി20 മത്സരത്തിൽ ഇന്ത്യൻ വനിതാ ടീമിന് ജയം. രണ്ടാം ടി20യിൽ ഇന്ത്യ എട്ടു റൺസിനാണ് ജയിച്ചത്. ആദ്യം ബാറ്റ് ചെയ്ത ഇന്ത്യ നാലുവിക്കറ്റ് നഷ്ടത്തിൽ 148 റൺസെടുത്തു. എന്നാൽ എട്ടുവിക്കറ്റുകൾ പിഴുത ഇന്ത്യൻ നിര ആതിഥേയരെ 140ൽ ഒതുക്കി.
ബാറ്റിംഗിൽ ടീം ഇന്ത്യക്കായി 48 റൺസുമായി ഷെഫാലി വെർമയാണ് തിളങ്ങിയത്. സ്മൃതി മന്ഥാന 20, ഹർമൻപ്രീത് കൗർ 31, ദീപ്തി ശർമ 24 എന്നിവരും ഭേദപ്പെട്ട പ്രകടനം കാഴ്ചവെച്ചു. ഇംഗ്ലണ്ടിനായി ടാമി ബ്യൂമോണ്ട് 59 റൺസുമായി ഇന്ത്യക്ക് വെല്ലുവിളി ഉയർത്തി. ഹെതർ നൈറ്റ് 30, ആമി എലൻ 11 എന്നിവരാണ് ഇംഗ്ലണ്ടിനായി പൊരുതിയത്.
മികച്ച ഫീൽഡിംഗിലൂടെ നാല് ഇംഗ്ലീഷ് താരങ്ങളെ ഇന്ത്യൻ പെൺപട പുറത്താക്കി. ബൗളിംഗിൽ പൂനം യാദവ് രണ്ടു വിക്കറ്റുകൾ വീഴ്‌ത്തി. പരമ്പരയിലെ ആദ്യ മത്സരത്തിൽ ഇംഗ്ലണ്ട് 18 റൺസിന് ജയിച്ചിരുന്നു. അവശേഷിക്കുന്ന മത്സരം നാളെ നടക്കും.
