കോയമ്പത്തൂർ ; ‘വെട്രിവൽ, വീരവേൽ’ സൂക്തങ്ങൾ പ്രവേശന കവാടത്തിൽ ആലേഖനം ചെയ്ത് കോയമ്പത്തൂർ ജില്ലയിലെ മധുക്കരൈ ആർമി റെജിമെന്റ് . പുരാതന കാലം മുതൽ തമിഴ് യോദ്ധാക്കൾ യുദ്ധ വേളയിൽ ഉയർത്തുന്ന വാക്യങ്ങളാണിത് .
2021 ലെ നിയമസഭാ തെരഞ്ഞെടുപ്പിന് മുമ്പ് വേൽ യാത്രയ്ക്കിടെ തമിഴ്നാട്ടിലെ ബിജെപി “വെട്രിവൽ, വീരവേൽ” എന്ന മുദ്രാവാക്യം ഉപയോഗിച്ചിരുന്നു . പ്രധാനമന്ത്രി നരേന്ദ്രമോദിയും സംസ്ഥാനത്ത് പ്രചാരണവേളയിൽ ഈ മുദ്രാവാക്യം ഉപയോഗിച്ചിരുന്നു.
അതേ സമയം വെട്രിവൽ, വീരവേൽ സൂക്തം ആലേഖനം ചെയ്തതിനെതിരെ ദേശീയ കോൺഫെഡറേഷൻ ഓഫ് ഹ്യൂമൻ റൈറ്റ്സ് ഓർഗനൈസേഷൻ എന്ന തീവ്ര ഇടതുപക്ഷ സ്വയം പ്രഖ്യാപിത ‘ആക്ടിവിസ്റ്റ്’ സംഘം രംഗത്ത് വന്നിട്ടുണ്ട്. ഇത് മത സൂക്തമാണെന്നും സേനയിൽ ഉപയോഗിക്കാൻ പാടില്ലെന്നുമാണ് ആക്ടിവിസ്റ്റുകൾ പറയുന്നത് .
എന്നാൽ ഇതൊന്നുമായി ബന്ധപ്പെട്ടല്ല തങ്ങൾ ഈ സൂക്തങ്ങൾ ഉപയോഗിച്ചതെന്ന് പ്രതിരോധ വകുപ്പിന്റെ പബ്ലിക് റിലേഷൻസ് ഓഫീസർ പറഞ്ഞു. ഈ വാക്യങ്ങൾ കാലങ്ങളായി ആർമി റെജിമെന്റിൽ ഉണ്ടായിരുന്നുവെന്നും കരസേനയിലെ ഓരോ റെജിമെന്റിനും ഇത്തരം വിജയ മുദ്രാവാക്യങ്ങളുണ്ടെന്നും അദ്ദേഹം പറഞ്ഞു .
മതേതര, രാഷ്ട്രീയേതര സ്ഥാപനമായ ഇന്ത്യൻ സൈന്യം എല്ലാ മതങ്ങളുടെയും മുദ്രാവാക്യങ്ങൾ സ്വീകരിച്ചിട്ടുണ്ട്, മാത്രമല്ല അഭിമാനത്തോടെ അവ പലപ്പോഴും പ്രദർശിപ്പിക്കുകയും ചെയ്യുന്നുണ്ട്. ഈ മുദ്രാവാക്യം ഇന്ത്യൻ സൈന്യത്തിന്റെ നിരവധി യുദ്ധ മുദ്രാവാക്യങ്ങളിൽ ഒന്നാണ്, അത് മദ്രാസ് റെജിമെന്റും അംഗീകരിക്കുന്നു.- അദ്ദേഹം കൂട്ടിച്ചേർത്തു .
Comments