ദുബായ്: ട്വന്റി 20 ലോകകപ്പിനുള്ള ഗ്രൂപ്പ് പ്രഖ്യാപിച്ച് ഐസിസി. സൂപ്പർ 12 ഘട്ടത്തിൽ ഇന്ത്യയും പാകിസ്താനും ഒരു ഗ്രൂപ്പിലാണെന്നതാണ് ഏറ്റവും വലിയ സവിശേഷത. ആറ് ടീമുകൾ വീതുമുള്ള രണ്ട് ഗ്രൂപ്പുകളാണ് സൂപ്പർ 12 ഘട്ടത്തിലുള്ളത്. ഇതിൽ ഗ്രൂപ്പ് രണ്ടിലാണ് ഇരു ടീമുകളും ഉൾപ്പെട്ടിരിക്കുന്നത്.
ഇംഗ്ലണ്ട്, ഓസ്ട്രേലിയ, ദക്ഷിണാഫ്രിക്ക, വെസ്റ്റ് ഇൻഡീസ് എന്നിവരടങ്ങുന്നതാണ് ഗ്രൂപ്പ് ഒന്ന്. ഇവർക്ക് പുറമെ, ആദ്യ റൗണ്ടിൽ കളിക്കുന്ന രണ്ട് ടീമുകൾ കൂടി ഗ്രൂപ്പിൽ ഇടം പിടിക്കും. ഗ്രൂപ്പ് എയിലെ ഒന്നാം സ്ഥാനക്കാരും ഗ്രൂപ്പ് ബിയിലെ രണ്ടാം സ്ഥാനക്കാരുമാണ് ഗ്രൂപ്പിലേക്ക് എത്തുക. ഇന്ത്യയ്‌ക്കും പാകിസ്താനും പുറമെ ന്യൂസിലൻഡ്, അഫ്ഗാനിസ്താൻ എന്നീ ടീമുകൾ ഗ്രൂപ്പ് രണ്ടിലുണ്ട്. ഈ ഗ്രൂപ്പിലും ആദ്യ റൗണ്ടിൽ കളിക്കു രണ്ട് ടീമുകൾ കൂടി ഇടം നേടും. ഗ്രൂപ്പ് ബിയിലെ ഒന്നാം സ്ഥാനക്കാരും ഗ്രൂപ്പ് എയിലെ രണ്ടാം സ്ഥാനക്കാരുമാണ് രണ്ടാം ഗ്രൂപ്പിലേക്ക് എത്തുന്നത്.
ലോകകപ്പിലെ യോഗ്യതാ മത്സരം എന്ന നിലയിലാണ് ആദ്യ റൗണ്ട് മത്സരങ്ങൾ നടക്കുന്നത്. ഇതിൽ ശ്രീലങ്ക, അയർലൻഡ്, നെതർലൻഡ്, നമീബിയ എന്നിവർ ഗ്രൂപ്പ് എയിലും ബംഗ്ലാദേശ്, സ്കോട്ട്ലൻഡ്, പാപ്വ ന്യൂഗിനിയ, ഒമാൻ എന്നീ ടീമുകൾ ഗ്രൂപ്പ് ബിയിലും ഏറ്റുമുട്ടും. ഇതിൽ രണ്ടുഗ്രൂപ്പുകളിലുമായി ആദ്യ രണ്ട് സ്ഥാനത്തെത്തുന്നവർ സൂപ്പർ 12 ലേക്ക് യോഗ്യത നേടും.
ഈ വരുന്ന സെപ്റ്റംബർ- ഒക്ടോബർ മാസങ്ങളിലായി ഇന്ത്യയിൽ നടത്താൻ നിശ്ചയിച്ചിരുന്ന ടി20 ലോകകപ്പ് കൊറോണ രണ്ടാം തരംഗത്തെ തുടർന്ന് യുഎഇയിലേക്ക് മാറ്റുകയായിരുന്നു. ഒക്ടോബർ 17ന് തുടങ്ങി നവംബർ 14 ന് അവസാനിക്കുന്ന രീതിയിൽ മത്സരങ്ങൾ നടത്താനാണ് ഐസിസി തീരുമാനിച്ചിരിക്കുന്നത്.
