കോട്ടയം: ഇന്ത്യയിൽ നിന്നുള്ള ആദ്യ ബഹിരാകാശ വിനോദ സഞ്ചാരിയാകാനൊരുങ്ങി സന്തോഷ് ജോർജ്ജ് കുളങ്ങര. റിച്ചാർഡ് ബ്രാൻസണിന്റെ വെർജിൻ ഗാലക്ടിക് ബഹിരാകാശ വിനോദയാത്രയ്ക്ക് സന്തോഷ് ജോർജ് കുളങ്ങരയും ടിക്കറ്റ് ബുക്ക് ചെയ്തു. തയ്യാറെടുപ്പുകൾ എല്ലാം അവസാന ഘട്ടത്തിലാണെന്ന് അദ്ദേഹം പറഞ്ഞു. രണ്ടരലക്ഷം ഡോളറാണ് (1.8 കോടി രൂപ) യാത്രാ ചെലവായി കണക്കാക്കുന്നത്.
ഇന്ത്യയിൽ നിന്നും യാത്രയ്ക്ക് ടിക്കറ്റ് എടുത്തിട്ടുള്ള ഏക വ്യക്തിയാണ് സന്തോഷ് ജോർജ് കുളങ്ങര. ബഹിരാകാശത്തേയ്ക്കുള്ള ഈ യാത്രയുടെ ഓരോ നിമിഷവും അവിടുത്തെ കാഴ്ച്ചകൾ മലയാളിയ്ക്ക് മുന്നിൽ എത്തിയ്ക്കുമെന്നും സന്തോഷ് ഉറപ്പ് നൽകി. സീറോ ഗ്രാവിറ്റി അടക്കം രണ്ട് ഘട്ടങ്ങളായുള്ള പരിശീലനങ്ങൾ പൂർത്തിയായി.
ബഹിരാകാശ യാത്ര എന്നായിരിക്കും എന്നത് സംബന്ധിച്ച് ഇതുവരെ തീരുമാനമായിട്ടില്ല. കൊറോണ പ്രതിസന്ധി നീങ്ങിയാലുടൻ തന്നെ യാത്രയുണ്ടാകുമെന്നും അദ്ദേഹം പറഞ്ഞു. 2007 മുതൽ ബഹിരാകാശ യാത്രയ്ക്ക് ശ്രമിക്കുന്നുണ്ട്. ഇപ്പോഴാണ് അതിന് അവസരം ലഭിച്ചതെന്നും മലയാളികൾക്ക് വേണ്ടി മലയാളി നടത്തുന്ന യാത്രയാണിതെന്നും സന്തോഷ് ജോർജ് കുളങ്ങര പ്രതികരിച്ചു.
